Dem erwirdign geistlichn herrn herrn Johannsn, abbt ze Lambach meinem gnedign herrn embewt ich Wallthesar Sannttos, burger zw Wells, mein willig gehorsam dienste zuvor. Lass ewr gnad wissen, das ich dem erbern Micheln Weisman, ledrer ze Wells, Kathrein seiner hawsfrawn und allen irn baidn erben ze kawffen hab gegeben mein pewnttn mit irer zuegehorung, glegen zw nagst dem Siechhof in Wellser pharr, an die pewnttn daselbs nachst, die ich dem Wolfgangen Selinger, burger zw Wells, verkawfft und alles von ewrn gnadn und gotzhaws ze Lambach erbrecht ist, und dient man von yeder pewnten besunder zw unser liebm frawn tag der dienstzeit achtt phening, wie von allter herkomen ewer gnadn und gotzhaws rechtn. Also senntt ich ewrn gnadn dieselb mein gerechtigkait daran bisher gehabt alles auf mit kraft des briefs, ewr gnad mit diemuetign vleiss bittennd, die benantn pewntten, wie ich die in gwer gehabt hab, dem obbenantten Micheln Weismann, seiner hawsfrawn und irn baidn erbn gnedigklich zu verleihen, ainen kawfbrief von mir und meinen erben daruber nach ewer gnadn und gotzhaws gwonhait und rechten awsgeend mit ewern gnaden insigl zwstet verfertign stet mir umb ewr gnad gehorsamlich zu verdienn. So gelob ich ewern gnaden nachkomen und gotzhaws fur mich und all mein erbn mit mein trewn aides weis dawider nichtz einzereden noch ze sprechen in kainen wegen ungeverlichn. Ze urkund hab ich vleissig gepettn die erbern weisn Niklasen den Aicher, diezeit des ersamen rats und Wolfgangen dem Gstettner, bed burger ze Wells, das sew ir insigl auf den brief ze zewgnuss gedruckht haben, doch in baiden und alln irn erbn an schadn, ich und mein erbn darundter verpinntten mit unsern trewenn innhalt des briefs stet ze haltn. Geben ze Wells an sunttag sand Dorothea tag anno domini etc. im xiiii^c und lxxxv^isten jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 121f, Nr. 3104