Dem erwierdigen geistlichnn herrnn herrn Johannsnn, abbt zw Lambach, unnserm genadigen herrnn ennpewt ich Warbara, des Joring Huebmer zw Teyttenhaim auss Tesselprunner phar elichenn hausfraw, und ich Hanns ir sun, do fuer ich mich obgenantter Jorig und Hanns sein sun angenomen haben, wen sy selber personlich nicht domugen hat, sein von gotzgewalt wegen unnser willig unnd gehorsam dienst bevor. Wir fuegen eurn genaden zw wissen, das wir recht und redlich verkaufft unnd kauflichenn zw kauffen geben haben unnserm lieben swagern dem Steffann Schaur zw obern Strass, und Magdalena seynner hausfraun und alln irn eriben, dew sy haben oder noch chunftigklich gewingen, und Leonhartten Zottelperger zw Zottelperg, Margretten seynner hausfraun und auch allen irn paiden eribenn, dew sy haben oder noch chunftigklich gewingen, unnsern geleichen eribtaill, so ich obgenantte Warbara ungeverlichen gehabt hann an dem Smidtzguettel zw Perig in Tesselprunner pharr, und gehort mit der herschaft euch und ewrn genaden gotzhauss zwe umb ain summa gelt, der wir von inn zw rechtten tagen an allen schaden recht und redlichenn schonn bezalt sein warden. Unnd senden ewrn genaden darumben dew offenn petzettel das ewr genad denn obgenantten unnserm lieben swagern unnd irnn hausfraun unnd allenn irnn eriben ein gewondlichen landtleuffing kaufbrieff darumben gebt und mit ewern genaden insigel ververtigt und bestat, und wen ewr genad den das alzo gethan hat, so geloben wir ewrn genaden, fur unns unnd all unnsern eriben euch unnd ewrn genaden gotzhauss inn ewr brieff unnd sigel auch vertigung nicht zw redenn noch annders yemandt von unnsern wegen angevor. Ich obgenanttew Warbara verzeich mich auch fur mich unnd all mein eriben des obgenantten meines geleichenn eribtaill ann dem obgenantten guetlen inn ewigew furzicht, das wir darzue noch darnach kain zuespruch noch vadrungen nymermer sollenn noch wellen haben weder mit recht noch anrecht, geistlich noch weltlich noch annders yemandt von unnsern wegen alles treulich ungevarlich, unnd sennden ewrn genaden dar umben dew offenn petzettel bewart durich unnser vleissigen gepett willenn mit der erbern weysen Leonhartten Vorstter zw Egelaw ambtman der obgenantten herschafft unnd Hannsen Haslinger burger zw Swanns, paider aufgedrukchtten petschadt, doch inn und irn paiden eriben auch der herschafft an ir vodrungen unvergriffenlich und an schaden, daruntter wir unns mit unsern treun aydes weys verpintten alles war und stat zw haltten inhalt der petzettel. Zeugen und gepet umb dew petschadt, auch umb das insigel sind die eribern maister Leonhart pader, Michel Pekch all ped burger zw Swanns, unnd Anndree Groshaupp zw Puebenlanndt unnd annder erber lewtt meniger. Geben nach Cristi unnsers herren gepurdt tausent vierhundert und darnach im funff unnd achzigistenn jar an suntag nach gotzleichnamstag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 145-147, Nr. 3122