Ich Wolfganng Taczgernn zw Wells bekenn fur mich, all mein erben und thuen kundt offenlich mit dem brieff allen, den er furkumpt. Alls ich von Wolfganngen Toppler, burger zu Wells, alls ainem lehentrager und gerhab an statt und von wegen seines vettern und muemen Thomen, Gorigenn Toppler weilentt im Podellspach gesessen saling sun, recht und redlichen kaufft hab den hoff mit seiner zuegehorung, genantt der Schaitellperg in Talhaimer pfarr gelegenn, der dann erbrecht und dinstpar ist dem erwirdigen goczhaus zw Lambach, den iecz gemellten hoff mt seiner zuegehorung hatt mir und mein erbenn der erwirdig und geistlich mein genadiger und lieber herr her Johanns, abbt zw Lambach, alls grunttherr bestatt und verlichenn nach lautt brieff und sigl, so ich von sein genaden dar umb hab. Auf solichs hab ich obgenantter Wolfganng Taczgernn an stat mein und meiner erbenn dem genantten meinem genadigenn herren von Lambach mit meinen trewnn an aidestatt gerett, gelobt und versprochen in krafft des brieffs, das ich und all mein erben von dem obgenantten hoff mit seiner zuegehorung dem genantten meinem genadigen herren von Lambach, seiner genaden goczhaus und nachkomen damst trew gehorsam und gewarttig sein sullen und wellenn und alles das davon leydenn und dullden alls ander des bemellten goczhaus erbler und hindersassen von solhem irem dinstparing urbarguetternn leydentt und dulldentt und sullen auch kain wanndlung damit nicht haben an des benantten meins genadigen herren vonn Lambach oder seiner genaden nachkomen hanntt, gunnst und guetten willen, auch iren dinst und herren vodrung von dem gemellten hoff alle jar jarlichen raichen und geben nach innhallt, lautt und sag des gemellten goczhaus urbarpuech alles getreulich und ungevarlichen. Zw urkund gib ich des allso den offenn brieff besigelltem mit meinem obgenanten Wolfganngen Taczgernn aigen anhanngunden innsigl, und zw pesser sicherhaitt und geczeugnuss hab ich mit vleiss gepetten den fursichtigen und weisen meinen liebm vettern Hannsen Kramer, mautter zw Ybs, das der sein innsigl zw sampt mir an den brief gehanngen hatt, doch im und sein erbenn an schadenn. Geschenn an monnttag vor des heyling kreucztag seiner erhohung nach Cristi gepurd vierczehenn hundertt und im funnffundachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 148f, Nr. 3124