Erwirdiger geistlicher herr unnsern diennst in guetn willen sein ewern gnaden bevor. Als wir ewern gnaden menigermallen geschriben und geklagt, wie ewern gnaden lewt von Lambach und am Stadl saltz auss Trann uber die Tunnaw furen und geben, das wider unnsern allengenadigisten herrn den romischen kaiser etc., auch der stat hie freyhait und gerechtigkait ist, die mawt hie verfuren, das aber bisher von ewern genaden nicht gewenndt, bitten wir ewer genad welle noch bey ewern genaden lewten daran sein, das solhs furbass nicht beschech, wurde aber ewer gnad das nicht bestellen, wo wir dann uber solhs ewern gnaden lewt mit dem salz und guet ankomen, wolten wir darumben aufhalten. Geben zu Enns an sambstag sannd Lamprechten tag anno domini etc. lxxxxv^o

Richter und rate||
der stat zu Enns