Erwirdiger geistlicher herr unnsern dienst in guetn willen zuvor. Ewrn gnaden schreiben uns yetz an jungisten getan von ewer lewtt wegen die das saltz auss der Trawn uber die Tunaw furen und geben, das wider unnsern allergenadigisten herrn den romischen kaiser etc. auch der stat freyhait und gerechtigkait hie ist, darczue unangesagt und unvermant, wer die selbigen sein, ewern gnaden zu verkunden, lassen wir ewr gnad wissen, das der Michel zu Gukenperg vormallns mer dan ainst saltz an beruerten endt gefurt und yetz aber an dem nagst vergangen freytag ain nawfart saltz uber die Tunaw gen Steyregk gefurt und geben hat, bitten ewr gnad noch mit sundern vleiss den Micheln dartzue halten, das er sich umb solhs verfuerts kamergut und verhanndlung hie recht und kerung thue, auch ewr gnad bey den nawfering an dem Stadl bestellen das sew an die enndt nicht farn, das wellen wir umb ewr gnad altzeit willig ind gern verdien. Geben zu Enns an sand Wenczlatag anno etc. lxxxv^to

Richter und rate||
der stat zu Enns