Dem erwirdigen in Got vater und herrenn, herren Johannsen, abbte zw Lambach meinem genedigen herren enpewt ich Hanns Kramer, mawtter zw Ybbs, mein willig dinste zw vor. Ich fueg ewern gnaden zw wissen, das ich meinem liebem vettern Wolfgangen Tatzgern und sein erbm zw kauffen gebm hab das gut, genannt das Wolfellehen mit seiner tzuegehorung, gelegen in der Schaffwisen in Welser pharr, das dann von ewern genaden und ewern genaden gotshaws erbrecht ist, darumbm den brieflich urkundt von ewren gnaden ausganngen sein, so ich den ewren gnaden hiemit sennde, umb ain summa gelts, der ich von im zw rechter weil und tzeit gar und ganntz an schaden betzalt bin worden. Nach solichem bitt ich ewr genadt mit sonnderm vleis, ewr genad welle dem obgenanntten meinem liebm vettern Wolfgangen Tatzgern und seinen erbm das obgenanntten Wolffellehen mit seiner tzuegehorung genedigklich geruechen ze bestatten und zw verleihen, auch brief und sigl daruber verfertigen und gebm nach ewren genaden und ewren gnaden gotzhaws gewonhait, sitten und rechten. Und so ewr genad das also getan hat, gelob ich obgenantter Hanns Kramer, mautter, fur mich, mein hawsfrawen Amaley und all mein erbm in ewer gnaden brief und sigel nichts ze reden noch dawider ze handln in dhain wegen trewlich und ungeverlich und wil das altzeit gern umb ewer genad und ewer genaden gotzhaws verdienn. Mit urkundt des petbrief mit meinem aigen obgemelten Hannsen awfgedrukchten in sigel. Gebm zw Wells an phintz tag nach sannd Franncistenn tag, so man tzallt von Kristi gepurde im viertzehennhundertundfunffundachtzigisstenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 152, Nr. 3128