Ich Liennhartt zwnn Rassenn gesessenn, und ich Angnes sein hausfraw bekennen fur uns und all unnser erbenn und thuenn kundt offennlich mit dem brief allen den er furkumpt. Alls wir von Steffann zw Furhollcz und seiner hawsfrawn Ellspettenn recht und redlichenn gekaufft habenn die halb pewnnten mit irer zuegehorunng, alls die mit marich und zawnn umbfanngen ist ze nagst der Rassinger gassen gelegenn nidertthalbm und ze nagst Lienndleins ze Furhollcz lussell in Widemspacher pfarr, die dann jarlichenn dintt in das guett zw Furhollcz vier pfenning, das dan erbrecht und dinstpar ist dem erwirdigenn goczhaus zw Lambach, die vorgemellt halb pewnntten mit irer zuegehorunng hat unns und unnsern baiden erben der erwirdig und geistlich unnser genadiger unnd lieber herr her Johanns, abbt zw Lambach alls grunttherr bestatt und verlichenn nach lautt brieff und sigl, so wir von sein genadenn dar umb habenn, habenn wir obgenantt Liennhartt zwnn Rassenn und ich Angnes sein hausfraw dem ieczgenantten unserm genadigenn herrn von Lambach fur unns und all unnser erbenn mit unssern trewn an aydestatt gerett, gelobt und versprochenn in krafft des brieffs, das wir und all unnser erbenn, wer dann die gemellt halb pewnntten innhatt und nuczt, dem genantten unserm genadigen herrn von Lambach seiner genaden goczhaus und nachkomen damit trew gehorsam und gewarttig sein sullen und wellen unnd alles das davon leyden und dullden alls ander des bemellten goczhaus erbler von solhenn iren dinstparing urbarguetternn thuenn und kain wanndlunng damit nicht haben an des benantten unsers genadigen herren von Lambach oder seiner genaden nachkomen hanntt, gunsst und guetten willen, auch den obgemelltn dinst in das benantt guett alle jar jarlichenn raichenn und geben, wievor gemellt ist, alles getreulich und ungevarlichenn. Zw urkund gebenn wir des allso den offenn brieff besigeltten mit des edllnn unnd vesstenn Pillgreim Mulhaimer zw Griess, an der czeit annwalld der vogtey gein Wells aigen awfgedrukchten innsigl, den ich obgenantter Liennhartt zwnn Rassenn anstat mein und der genantten meiner hausfrawnn vleis dar umb gepettenn hab, doch im unnd sein erbenn an schadenn, darunntter ich mich ieczgemellter Liennhartt fur mich, mein hausfrawnn und all unnser erbenn an aidestaett verpindt alles war unnd statt ze hallten innhallt des brieffs. Zeugenn der gepett umb das innsigl sind die erbernn und weisenn Gorig Reichhuber, Wernnhartt Weiss, Liennhartt zw Otteinsperg, baid ambtman der vogtey zw Wells und ander leutt mer. Geschehenn an monnttag vor unnser herrenn fronnleichnambstag anno domini im funffundachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 142-144, Nr. 3120