Dem hochwirdigenn und geistlichenn hernn hern Johannsn abtte zw Lambach unserm genadign hern entpewtt ich Sigmund von Hatting und ich Anna sein elliche hausfraw unsser gar willig und undertanyg gehorssam dinst und tun ewrenn gnaden zw wissen, das byr verkauft und kauflichen zw kauffn geben zw ainer gannzen ewiger verrzicht inhalt der pettzettel unser eribschaft und gerechtigkait, so wir gehabt haben an dem Odmair gutt das halbs mit aller seiner zugehorung zu nidern Samatting und ligt in Tallhaimer phar und im gericht Erlach, dar auff ich dan meiner genanten hausfraw ain gemacht getan hab nach inhaltung ains gemachts brieff, den sy dar uber gehabt hatt, derselb brieff meiner hausfraw verloren ist worden und hat mir auf solhs vergunnen und das zue geben, das wir nun paide und unverschaidenlich solhe gerechtigkait nun verkauffen, wie obbemelt ist, ob erbler solher gemachtsbrieff furan weiter her dhain von wem das peschach, der selbrieff sull izundt und hinfur ewigklichen mit seinen punten und artickhlln dhain kraft mer haben, sunder ab und to sein angever. Darauff habn wir solhew gerechtigkaitt geben denn erberen Gorig Mayr zu Pruckh, Warbara seiner hausfrawn und allen iren eriben. Auf solhs pitten wir eurew genade als unsern genadigen hern mit undertannigem vleis, eur gnad welle den genanten Goring und Wolfgang iren hausfrauen und allen iren eriben ain gebaulichen kauffbrieff under euren genaden insidl ververttigen. So nun das euer gnad getan habe, so geloben wir paide obbemelte euren gnaden und den euren fur uns und all unser paider eriben yezt und hinfur ewigklichen bein unsern ernn und trewen nichtz dar wider noch darein gar in dhainerlay weis zu sprechen weder mit recht noch an recht alles gedreulich und ungeverlich und geben des darumb euren genaden dy offenn pettzetel verpetschaft under mit der erberen und weissen Partlme Vallinpruen, gerichtschreiber im Erlach, und Goring Kessellpodn, burger im Newnmarkht, paider furgedruchten petschaften, und dy wir paide obbenante mit vleis dar umb gepeten haben, doch in und allen iren eriben an schaden umb euer genaden sidl an den kauffbrieff und umb dy petschaft sindt zeugen dy erberen und weissen Ulrich Peckh, Michell Schmid albaidt burger im Newnmarkt, Gorig Veznnaicher und mer frumer lewt genug. Wir verpinten uns auch dar under und fur all unser eriben alles stat zu halten inhalt der zetell. Geschechen an mantag vor unssers herrn fronleichnamstag, als man zalt von Cristy gepurtt taussent vierhundert und darnach im funffundachzigkisten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 139f, Nr. 3118