Dem erwirdigenn und geistlichenn herren hern Johannsen abbt zw Lambach meinem genadigenn und liebm herren embeutt ich Margrett, Ulrichenn zw Grueb gesessen eliche hausfraw mein unttertanig willig dinst zuvor und fueg ewrn gnaden zw wissenn, das ich recht und redlichenn verkaufft hab das halb haws, stall und stadl mit iren zuegehorung zw Grueb, gelegenn in Weybarnner pfarr, darin wir dann heylichenn gesessenn sein, meinem liebm swagernn Liennhartten zw Dirichshaim, seiner hausfrawnn Anna und allen iren baiden erbenn umb ain summa geltts, der ich von in ganncz und gar ausgericht und bezallt wordenn bin zw rechten tagen an allen schaden, bitt ich ewr gnad mit sunderm diemuettigem vleisss, welle dem genantten meinem swager, seiner hausfrawnn und iren baiden erbenn ain kauffbrieff umb das egemellt halb haws, stall und stadl nach ewrn gnaden goczhaws gewonnhait verferttigenn und gebenn. So das beschehenn ist, glob ich obgenantte Margrett mit meinen trewnn an aidestatt in krafft des brieffs furpaser in ewr gnaden brieff, sigl unnd vertigunng nicht zw redenn noch dawider zw thuenn in kainerlai weiss angevar. Zw urkund gib ich ewrn gnaden des allso die offenn petzettl mit des erbernn Hannsen Mullechner ewr gnadenn ambtman aigenn aufgedrukchten pettschafft, den ich obgenantte Margrett mit vleiss dar umb gepetten hab, doch im und sein erbenn an schadenn. Geschehenn an mannttag nach sand Giling tag anno domini im sechsundachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 180f, Nr. 3151