Dem erbirdigen vatter in Gott herrn herrn Johannsn abt zw Lambach unserm genadigen hern enpewt ich Michel am Lechen in Sbanser phar und ich Wolfgang zw Grillenmoos, und ich Jorg Schuester zw nider Reger, und ich Jorg am Moslner in Unknacher phar, all vier gebrueder, unser willig unnttertanig dienst und fuegen eurn genadn zw wissen, das wir uns auff ein ebigss endt verczigen haben umb allen unsern vatterlichen und muetterlichen erbtall, so wir gehabt haben auff dem guet zw nider Puechleyten, genant das Tanpawrn guet, das dan ewrn genaden goczhawss dienstpar ist, das haben wir uns verczigen gegen unsern lieben vettern Micheln Tanpawrn dacz den Haffnern in Unknacher phar und allen sein erben, doch ob uns der tod ich rechtlichen herbider gab, des verczeichen sich ain tall gegen dem andern nicht. Und auff solichs pitten wir, ewr genad well im ain lantleiffigen verczeich brieff untter ewrn genaden insigel darumben verfertigen, und so eur genad das also getan hat, globen wir eurn genaden fur uns, all unser erben in eur genaden insygl nicht zw redn in kainer lay weiss und wellen das umb eur genad mit aller unnttertanigkait verdien, und sentten eurn genaden dar umben dy offen petzetl verpetschafft durch unser vleisiger bett willen mit der erbern und weisen Hannsen Han, ainer des racz der stat Voklaprugk, und Hannsen Kruczinger, burger da selbs mit irer baider awffgedrukten petschafft, doch in und irn erben an schaden, dar under wir uns verpinden alls war und stat zw haltten, das der brieff awsweist. Zewgen der gebet umb eur genaden insygl auch hie umb dy awffgedruckten petschafft sein dy erbern Lienhart Gerib zw Eyting, Sigund Mawrer zw Preysing, Michel Eberl zw ober Puchlspach und ander erber lewt meniger. Der brieff ist geben an des heyligen Kreycztag seiner erfinden, do man zallt von Kristi geburd tawsent vierhundert und im segsundachczigisten jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 172f, Nr. 3145