Ich Liennhartt, Hannsen Zieglmaister zw Strass gesessenn sun, und ich Magdalenn, sein hausfraw, bekennen fur uns all unnser erbenn und thuen kundt offennlich mit dem brieff allen, den er furkumpt, alls uns der erwirdig und geistlich unser genadiger und lieber herr her Johanns, abbt zw Lambach, alls grunttherr die hernach geschribenn drew lannttl mit iren zuegehorunng zw freysacz und rechter freystifft lassenn hat, item das lannttl, genantt das Geren lannttl ze nagst an die Hollczgassen ze Strass gegen der Haid wertts, das ander lannttl an des Hainczl weylentt zw Strass gesessen saling luss in dem selbm velld, und das dritt lannttl, genantt der Scherin akcher ze nagst der Mertt Schuesterin velld ober her an in Gunskircher pfarr. Allso haben wir obgenantt Liennhartt und ich Magdalenn, sein hausfraw, fur uns und all unnser erbenn mit unsern trewnn an aidestatt gerett, gelobtt und versprochenn in krafft des brieffs, das wir die genantten drew lannttl mit iren zuegehorungen nicht anders innhabenn, nuczen und niessen sullen und wellenn dann zw freysacz und rechte freystifft, die weill wir dann die gehaben mugen mit gunsst, willen und wissen des genantten unsers genadigenn herren von Lambach und seiner genaden nachkomen und uns die nicht von in aufgesagtt wirdett angevar, doch in solher beschaiden das wir oder unnser erbenn dem genantten goczhaus von den obgemellten lannttlein mit iren zuegehorung alle jar jarlichenn davon raichenn und dienn sullen zw unnser liebm frawnn tag der dinstzeitt sybennczehenn Wienner pfenning und sullen in auch damit trew, gehorsam und gewarttig sein, alls von solhem freysaczigenn guettern gepurd getrewlichenn und ungevarlichenn. Zw urkund gebenn wir in des allso den offenn brieff besigellten mit der edllenn vesstenn Hannsen Zarttlein an der czeitt hoffrichter zw Lambach, und Hannsenn Leroch am Stadll baider aigenn anhanngunden innsigell, dew ich obgenantter Liennhartt an stat mein und der genantten meiner hausfrawnn mit vleiss dar umb gepetten hab, doch in baiden und iren erben an schadenn, dar unntter ich mich iecz gemellter Liennhartt fur mich, mein hausfrawnn und all unnser erben mit unsern trewn an aidestatt verpintten alles war und statt ze halltenn innhallt des brieffs. Zeugenn der gepett umb das innsigl sein die erbernn Caspar Reczer, Ulrich Vorster zw Greillspurg und Fridrich Mayr am Velld. Geschehenn an mittichenn vor sand Gerigenn tag, alls man zallt nach Cristi gepurd vierczehenn hundertt und im sechsundachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 170-172, Nr. 3144