Erbierdiger geysstlicher lieber herr mein willig dienst sein eurn gnadn vor an weraitt. Lieber herr, ich hab mein guetter verkaufft und mein sach in ander weg vermain zu sikchen hab ich nach inhallt des lechn prieff mir eur gnad gebn sezt eur gnad fur eur urbar und alle handlung mit eurer hantt weschechn, hab ich andre lechen von dem von Kremsmunster gegen ain ander ubersechn, dar in ich vindt, das ich durich solichs wesbert pin wen das eurn gnadn urbar wer hiet mir nicht natt gethan von eurn gnadn lechn zu nemben darauff pitt ich eur gnad mir ain gebondlichn lechen prieff zu gebn, damit yn dem kauff nicht verhyndert werdt, wen ich des zu merikchlichn schadn komben wurd, das will ich umb euch und eur gotzhaus zu sambt der pillichkait umb eur gnad verdien und pit eur gnadt well mir yn dem handl nicht weytter zug noch verziechn thuen, an sand Veycztag anno domini etc. lxxxvii.

Petter Greissnegker