Dem erwirdigen herrn herrn Johann abbt zw Lampach meinem genadigen herrn empewt ich Lienhart Muller zw Kemmaten mein undertanigen gehorsam dinst und fueg ewr gnaden ze wissenn, das ich mich an statt mein und statt meiner schwester Barbara saligen Merten an der Obernmull zw Hoffkirchen gesessen hausfraw kinder mit namen Sigmundt zw Holtzaren an der Obernmull, Lucas an der Gallermull, Wernhartten Romlar und Margrethen ze Moss, alle geschwistarcht und an statt Wolffganngen Schlegell meiner schwester Anna sailigen sun Wolffganngen Schlegel zw Kemmaten sailigen gesessen hausfraw, und anstat meines prueder Merttnn, der nit bei landt ist, fur dew ich mich allenthalbem und fur ir eriben und miteriben angenomen hab und nym mich an frewntleich und liebleich vertragen und auff ain ganntzen entlichen abschied veraintt habe von wegen der eribschafft, so ich und mein obbemelt miteriben an der mull ze Zwisell, die ewern genaden gotzhaws ze Lampach eribrecht ist, gehabt haben mit unnsern lieben vettern Mertten und Lienhartten geprueder die Kunig zw Holtzarn und iren miteriben und von wegen zerung, anvodrung und annder spruch, so wir der bemelten eribschafft halbem zw in vermaintten ze haben nichtz darinn ausgenomen, darumb mir und mein ytzgenannten miteriben ain gelt gesprochen ist worden, des wir ganntz bezaltt unnd ausgericht sindt an scheden, daran mich an stat mein und meiner offbedachten miteriben wolbenuegt und hinfur benuegen soll. Darauff pitt ich mit allem vleis an statt mein und an statt meiner miteriben, ewr gnade gerueche mit ewern gnaden insigell bemelten unnsern vettern den Kunigen und iren miteriben ain verzeichbrieff von mir und an statt der bemelten meiner miteriben ausganngen ververtigen und bestatten und so ewr gnad das also gethon hat, gelob ich ewr gnad bey meinen trewen fur mich und mein miteriben hinfur nichtz in ew gnaden insigell und vertigung ze reden in kainerlay weis. Und schick ewr gnaden des zw urkundt die offen pettzedel ververtig und zw gezeugnus mit der ersamenen weisen maister Gorgen Huebner von Dinckelspuhel und Thoman amptman zw Krottendorff beder zeruck auffgedruckten petschaden, doch in und iren eriben an schaden. Datum Wells suntag nach Pangratzii anno domini etc. lxxxvii.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 539f, Nr. 3441