Wir Johanns von gots genaden abbte zw Lambach bekennen mit den offen brief aller menigkleich, den er furbracht wirt zu horen oder ze lesen, das uns und unnserm convent der ersam geystlich herr her Jorig Nagel brister zw Wels, aus besunder frewntschaft und vertrawn, so er zu uns hat, zu behalten geben hat ain summna geldts in gold und in munnss in ainer beygurtel mit seinem petschadt bewart. Auch so seinn wir im vormaln suldig worden ain summa geldtts innhalt aines suldbriefs, so er darumb von uns hat den handel also geordnet in solher beschaydenhayt und maynung, ob im in seinem leben notdurft wurd, davon etwas oder ganntz zu prauchen oder aber anndrew ordnung damit tun wurdet, das wir im dann das an alle irrung und widersprechen, wann er das an uns ervordert, widerumb antwurtten sullen und wellen. Beschech aber, das er solh geldt bey seinem lebentigen an uns nicht ervordret, auch damit kain anndrew orndnung und gescheft nicht tat und orndnet und also mit tod verschied von dem gegenwurtigen leben, alsdann sol als solh bemelt geldt, gelihens und das uns zu behalten geben ist worden bey uns und unnserm gotshaws Lambach beleyben inhalt brief und sygel, so wir von im darumb haben an aller seiner frewndt, auch aller annder menigkleich irrung und hindernuss angever, doch in solher beschayden, das wir in in unnserm gotshaws bestatten und begraben sullen, darumb er uns dann vormalln mit dyemutigen vleyss gepeten hat auch zu hayl seiner seel lobleich gotsdinst haldten den ersten, den symbten und dreyssigisten mit dem hohen glokken geleyt mit kertzen, aufparen etc. Auch darnach mit namhaffter anczal mess in ettlichen jaren zu hayl seiner und seiner vorvordern und nachkomen selen aus seinem geslacht als wir dann das auch mit einander abgeredt haben. Auch sullen und wellen wir im auf sein grab ainen grabstain legen und machen lassen, darauff auch seinen nam mit gedachtnuss und geschrifft einhawn lassen alles getrewleich und ungeverleich. Ze urkundt geben wir im den gegenburtigen brief besigelten mit unnserm aufgedrukchten insygel und an stat unnsers convennt sind der sachen zeugen dy ersamen geystlichen unnser convenntbrueder, brueder Conrat supprior und gustar, brueder Michel, brueder Pangratz kelner, brueder Wolfgang pharrer, brueder Thoman und brueder Anndre. Beschehen als man zalt nach Cristi gepurdt vierczehenhundert und im syben und achtczigisten jar an sand Pangratzen tag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 188f, Nr. 3159