Dem erwierdigenn geistlichenn herrn herrn Johannsen, abbt zw Lambach, meinem genadigen herrnn ennpewt ich Waltpurga, des Petter zw Smidhaim inn Unnkchnawer phar elichew hausfraw und Wolfganngenn etbenn gesessen auff der Lewtten inn Otzpekcher pharr, unnd Margretten seynner hausfraun saling eliche tochtter mein willig und gehorsam dienst bevor. Ich fueg ewrn genaden zw wissenn, das ich recht und redlich geseczt und verseczt hab zw aynnem rechtten fuerphandt all meinen geleichen eribtail, so ich den ungeverlich hab pey meinem lieben swager und muemen Joring Storer zw Riczling auss Otzpekcher phar, unnd Anna seynner hausfrawn und allen irn payden erbenn an dem guetlen, do sew hewslichen auffsyczczen, genandt das Smid guettel, und an dem Odguettlen daselbs zu Riczling, und an dem guetlen zw Weygenshaim, und gehort als ewrn genaden und genaden gotzhauss zw umb vierczechenn phunt phening landgabiger munss, dew sew mir und mein hauswierdt zw grossen notten bereit gelichen habent, und haben all jar jarlich losung dar auff zw unnser lieben fraun tag der lichtmess vierczechen tag vor oder hinnach und sunst im jar nicht mer. Sew und ir eriben sollen unns und unnsern eriben auch all jar jarlich all die weill wir nicht losen herausdien vierdthalben schilling phening landtgabiger munss. Und sendt ewern genaden darumben dew offen petzettel und pit, eur genad well dem obgenantten meinem lieben swager und muemen und allen irn paiden eriben ein gewondlichen landtleuffing satzbrieff darumben geben. Und wen ew genad den das alzo gethan hat, so geloben ich ewrn genaden fur mich und all mein eriben euch und ewrn genaden gotzhawss nicht zw reden noch anders yemandt von unnsernn wegen pey unnsern treun aydes weys alles treulich ungeverlich, und geben ewrn genaden darumben den offen petzettel durch meiner vleissigen gepett willen bewardt mit der erbern weysen Leonnhartten Vorstter zw Egellaw ewern genaden ambtman, unnd Hannsen Haslinger, burger zw Swanns, payder aigen aufgedrukchtten petschadt, doch in und irn paiden eriben an schaden und euch und ewrn genaden gotzhawss an ewr vodrung unvergriffenlich yn allen sachen, daruntter ich mich fur mich und all mein eriben pei meinen treun aydes weys verpindt alles war und stat zw haltten inhalt des briefs. Zeugen der sachen und gepet umb die petschadt auch umb das insigl an den satzbrieff sind die erbern Hainreich Smid zu Ygelsod, Caspar am Kalttenprun, Veicht Mulner under Perig und ander erber lewt meniger. Geben nach Cristi gepuerdt tausent vierhundert und darnach im acht und achzigisten jar an phincztag vor dem hayling Palmtag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 217-219, Nr. 3178