Dem erwirdigen in Got und geistlichen herren hern Johanns, abt zw Lambach, ennpieten wir hernach geschriben mit nomen Sigmund Chern zu Adming, Angnes sein hausfraw, Sigmund Has zw Holczhaim, Barbara sein hausfraw, Sigmund Polmulner, Margret sein hausfraw, Lienhart Kunhaimer zu Kunhaym, Anna sein hausfraw, Jorig Kunhaimer und Steffan Kunhaimer, mulner zu Sneczing, und zu sunderhayt versprech ich fur mein czwen prueder Mert und Kaspar und fur mein swester Katrey, dy Hafnerin zu nyder Otnang, unser willig gehorsam dinst wevor, und fuegen ewren genaden zu wissen, das wir zu kauffen haben geben ainen staten ewigen kaufs unserm lieben vettern Taman Mulperger zu Mulperg, Barbara seiner hausfrawn und allen iren bayden erben all unser erbschaft und gerechtikayt, so wir gehabt haben auf der Scheyben mit allem zugehoren, nichz ausgenomen, gelegen in Gebolczkircher pfarr in Starchenberger gericht und ist erb von ewren genaden und dem goczhaus Lambach, darumben in dann von uns brieff und sigil gesprochen ist worden. Hieinnen pitten wir ewr genad mit sunderm fleys, ir wellet in mit ewren insigil ainen kaufbrief dar uber vertigen nach aller notturft, das ist unser gueter will, gunst und wissen, und geloben auch bey unsern ayden und trewen jeczo noch hinfur nychcz dawider zu reden noch zu vodern haben weder mit geistlichem noch weltlichem rechten noch sunst an recht in kainerlay weys angevar. Des zu urchundt senden wir ewren genaden den offen pettbrief under des erberen weysen Kolman zu Kirchtorf ewrer genaden ambtman aygen aufgedruckten pettschaft, den wir mit fleys dar umben gepeten haben, im, seinen erben und pettschaft an schaden, dar under wir uns als wir oben zu anfang des briefs benent sein fur uns und all unser erben und dafur wir uns angenomen haben und ir erbenn mit unsern trewen an aydesstat verpinden alles das war und stat zu halten inhalt des briefs. Zewgen der gepett umb das pettschaft auf den pettbrief auch umb das insigil an den kaufbrief sein dy erbergen Michel Ruckengast zu Gaspolczhofen, Kaspar Hafner zu Zwisel, Lienhart Schneyder zu Gebolczkirchen, Hanns Huebmair zu Puesing, Michel Huebmer zu Zaysolting. Der brief ist geben an sannd Gregorgentag anno domini etc. lxxxviii jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 316f, Nr. 3177