Dem erwirdigen geistlichen herrn herrn Johannsen abbt zu Lambach meinen genadigen herrn enpewt ich Warbara, etwan des Steffan Fleischackher gesessen zu Kopl saligen wytib, mein unttertanig gehorsam dienst bevor. Fueg ewern gnaden zu wissen, das ich recht und redlich verkaufft und kaufflich ze kauffen geben han meinen geleichen erbtayl, so ich dann hab ungevarlichen auff dem guet zw Wyelting, da er die zeyt auff gesessen ist der Nigkl, als gelegen yn Gewaltzkircher ppfarr und gehort eurn gnaden zue meiner lieben schwestern Dorothea, des Kasmuetrer Gorgen saligen hausfraw zu Paungarting in Schwanser pfarr gelegen, allen yren paiden erben umb ein suma gellt, der ich und mein erben von yn und von iren erben zu rechter zeit an allen schaden recht und redlich schon pezalt pin worden. Und senndt euren genaden darumben di offen zettl, pit euch als meinen genadigen herren, yr wellt derr obgenanten Dorothea und iren erben einen gewondlichen landtleuffigen kauff brieff darumben geben unnder eurem ynsigel ververtigen und pestatten. Und so ewr genad das also getan hatt, gelob ich euren gnaden fur mich und all mein erben euren gnaden yn ewer brieff und sygel nichtz ze reden, und gib euren genaden die offen zettl, pewart durch mein fleyssigen pett willen mit der eweren Wolffgang Wolffhueter und Micheln Holtzhaymer, payd burger zu Schwannss payder auffgedrugtten pettschafft, doch yn und yren peden erben an schaden. Zeugen und gepet umb dy petschafft auch umb das insigl sinnd di erbern Thoman Schuester auff sandt Philippsperg und Thoman Kunig zu obern Holtzhaym, und Leonnhart Seydl all aus Schwanser pfarr, und ander erber leut mer. Geben nach Cristi geburd tausent vierhundert darnach in dem acht und achzigisten jar an montag vor invocavit.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 315f, Nr. 3176