Dem erwirdigenn und geistlichenn meinem genadigen und liebem herren hern Johannsen, abbt zw Lambach, embeutt ich Magdalenn, Liennhartten Schuester weylentt zw Nidernnenttorn saling tochter, mein gehorsam dinst mit guettem willen zuvor und fueg ewren genaden zw wissenn, das ich meiner liebm muemen Margretten, Wolfganngen weylentt zw Nidernenttarn saling tochter, recht und redlichen verkaufft hab ainen drittaill, so ich gehabt hab in dem mitternn guett zw Puechleytten mit seiner zuegehorunng in Gaspaczhofer pfarr gelegenn, das dann ewrn gnaden und ewr gnaden goczhaus urbar und dinstparigs guett ist, und bitt ewr gnaden mit sunderm diemuttigem vlesss, alls mir mein genadiger herren wellet der genantten meiner muemen Margreth und allen iren erbenn ainen kauff brieff nach gewonnhaitt ewr gnaden goczhaus umb den gemellten drittail verferttigen und bestatten, so das beschehenn ist, glob ich ewern gnadn hiemit in krafft, des brieffs mit meinen trewn an aidestatt furpaser in ewr gnaden brieff, sigll und verttigunng nicht zw reden noch dawider ze thuenn in kainerlai weiss getreulich und ungevarlichen. Zw urkundt geben wir ewrn gnaden des allso die offenn pettzettl, versorigt mit des erbernn weisen Kollman Alltenhofer ewr gnaden ambtman zw Gaspaczhofenn aigen zw rugk aufgedrukchten pettschafft, den ich obgenante Magdalen mit vleiss darumb gepetten hab, doch im und sein erbenn an schadenn. Zeugen der gepett umb das innsigl und pettschafft sein die erbernn Liennhartt Schneider zw Gebollczkirchen, Sigmundt Alltenhofer und Michell Hinterhollczer. Geschehenn an mittichenn nach sand Oswolltstag anno domini im achtundachczigisten jarnn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 230f, Nr. 3188