Dem erwirdigen in Gott und geistlichenn meinem genadigen und liebm herren hern Johannsen, abbt zw Lambach, embewtt ich Wolfganng Gupf auffm Egk gesessen, mein gehorsam unttertanig dinst zuvor und fueg ewrn gnadn zw wissenn, das ich recht und redlichen gemacht und gegeben hab meiner liebm hausfrawnn Margretten, des Steffann Wirtt zw Mekchenhofenn tochter, sechczehen pfundt pfenning munss lanntswerung zw rechter freyer morigengab nach dem lanndes rechten ob der Enns auf allem meinem geleichenn erbtaill und gerechtigkaitt, so ich ungevarlichen hab auf der halbm huebm aufm Egk mit seiner zuegehorung, genantt die Gupfllhuebm in Mekchenhofer pfarr gelegen, die dann ewern genaden und ewer gnaden goczhaus urbar und dinstparigs guett ist und dar zue all mein varunde hab gleich halbe. Auf solichs pitt ich ewr gnad mit sunderm diemuettigen vleiss, alls mein genadigen herrn wellet der genantten meiner hausfrawnn umb solich mein gemacht ainen gewonndlichen gemachts brieff nach gewonndhait und form ewr gnaden goczhaus verferttigen und bestatten, so das beschehen ist, glob ich ewrn gnaden hiemit in krafft des brieffs furpaser in ewrn gnaden brieff, sigl und verttigung nicht zw reden noch dawider ze thuenn in kainerlai weiss getreulich und ungevarlichenn. Zw urkundt gib ich ewrn gnaden des allso die offen pettzetl pewartt mit des erbernn weisen Kollman Alltenhofer, ewer gnaden ambtman zw Gaspaczhofenn aigen zwrugk aufgedrukchten pettschafft, den ich obgenantter Wolfganng mit vleiss dar umb gepetten hab, doch im und sein erben an schaden. Zeugen der gepett umb das innsigl und pettschafft sein die erbernn Steffan Taufkircher, burger im Newnnmarkcht, Michell Mayr zw Perkchaim und Sigmundt Pawrsperger. Geschehen an pfincztag nach sand Jacobstag anno domini im achtundachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 228f, Nr. 3187