[Fridericus dei gracia] postulatus et confirmatus Pataviensis, comes de Otting, venerabili et devoto in Christo patri abbati monasterii Lambacensis ordinis sancti Benedicti notre diocesis salutem in domino. Exhibitum est nobis hiis novissimis diebus decretum eleccionis futuri prelati et abbatis monasterii in Gersten ordinis santi Benedicti eiusdem nostre diocesis de persona fratris Leonardi presbyteri et professi eiusdem monasterii facte atque pro parte prioris et conventus, ne monasterium ipsum diutius viduitatis deploraret incomoda humiliter petitum quatenus examinato negocio eleccionis tandem ad eiusdem et electi confirmationem procedere dignaremur. Nos vero aliis gravissimis hoc tempore ecclesie nostre negociis impediti quominus expedicioni huiusmodi personaliter intendere possumus, prefatorum prioris et conventus peticioni in ipsius viduati monasterii sublevamen inclinati vicas nostras in hac parte tibi abbati Lambacensi predicto committendas duximus et tenore presencium et certa nostra sciencia committimus volentes, ut statuto per te termino premisso proclamationis crida negocium eleccionis huiusmodi in forma iuris examines, quam quidem eleccionem, si rite et legittime celebratam electum quam habilem et ydoneum reppereris recepto ab eo iuramento atque observatis observandis tandem eleccionem ipsam nostro nomine et auctoritate confirmes et approbes preficiens prefatum patrem Leonardum cum plena potestate iurisdiccionis et administracionis eidem monasterio in futurum abbatem et pastorem expeditis super hoc literis necessariis et oportunis salvis iuribus nostris et cancellarie nostre. Datum sub nostro impresso sigillo die penultima mensis maii anno domini etc. octogesimooctavo.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 224f, Nr. 3184