Raimundus Peyraudi, ecclesie Xanctonensis administrator, magister in theologia, sanctissimi domni nostri pape prothonotarius ac referendarius domesticus ad Alamaniam universaque et singula provincias, civitates, terras et loca Germanie sacro romano imperio et illius electoribus subiecta, eiusdem sanctissimi domni nostri pape et apostolice sedis cum plena potestate legati de latere, nuntius et orator, ad futuram rei memoriam. Ex commisso nobis ab apostolice sedis beneplacito legationis officio ad ea libenter intendere et nostre mentis cogitatus propensius effundere debemus, per que christifidelium animarum salus procurari et copiosius in vinea domini cultorum numerus provenire valeat. Exhibita siquidem nobis nuper pro parte venerabilis et religioso viri domni Johannis abbati monasterii Lambacensis ordinis sancti Benedicti Pataviensis diocesis petitio continebat, quod ipse speciali indulto suffultus possit per se ipsum christifideles ad eum venientes eorum confessionibus diligenter auditis ab omnibus casibus episcopalibus absolvere, verum si confratribus suis cum ipse iam in senectute constitutus sit, similis facultas concederetur profecto plurium christifidelium animarum salus procuraretur, quare pro parte eiusdem Johannis abbatis nobis fuit humiliter supplicatum, ut sibi et fratribus suis quoad vixerit in casibus episcopalibus facultatem absolvendi concedere aliasque in premissis oportune providere benigne dignaremur. Nos igitur huiusmodi supplicationibus inclinati Johannis abbati et monachis dicti monasterii sui quoad ipse Johannes vixerit ut omnes utriusque sexus christifideles ad eos venientes eorum confessionibus diligenter auditis ab omnibus et singulis casibus episcopalibus necnon sententia excommunicationis ab episcopo emanata absolvere et desuper penitentiam iniungere libere et licite valeant auctoritate legationis, qua fungimur tenore presentium indulgemus, non obstantibus constitutionibus et ordinationibus in provincialibus vel synodalibus conciliis editis generalibus vel specialibus ceterisque contrariis quibuscumque. In quorum fidempresentes litteras fieri nostrique sigilli iussimus appen sione muniri. Datum Lintz Pataviensis diocesis anno incarnationis dominice millesimo quadringentesimo octuagesimo nono sexto decimo kal. aprilis, pontificatus sanctissimi in Christo patris et domni nostri domni Innocentii divina providentia pape viii anno sexto.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 260f, Nr. 3214