Wir Johanns von gotts genaden abbt zw Lambach bekennen mit dem brieff, das fur uns komen sind Hanns und Hainrich gebrueder die Tenngken im Fluchtwanng gesessenn und mit sampt in ir swester Magdalenna, Liennhartten in der Aw hausfraw, alle drew Petternn Tenngken saling kinder und habentt mit wolbedachtem muett und guettem willen recht und redlichenn verkaufft all ir erbschafft und gerechtigkaitt, so ir yedes ungevarlichen gehabt hat in der wisenn mit irer zuegehorung ze Praittenschuczing auf der Praittwisenn zwischenn des pfarrar und Michellnn von Apping wisen, gelegenn in Swannser pfarr, daran ir yettweders ainen dritaill gehabt hat, die dann erbrecht ist von uns und unnserm gotshaus, des wir erweist wordenn sein mit briefflicher urkundt von unserm vorsedll abbt Johannsen saliger gedachtnuss und von unserm connvent dar umb ausganngen und habent die zw kauffenn geben irem liebm swagernn Casparnn Garttner, unserm hoffmaister und burger zw Lambach, Margretten, seiner hausfrawnn, irer swester und allen irenn baidenn erbenn umb ain summa gellts, der sew von in ganncz und gar ausgericht und beczallt worden sein zw rechten tagen an allen schadenn. Auf solichs patten uns die obgenantten Hanns und Heinrich gebrueder die Tenngkenn und mit sampt in die gemellt ir swester Magdalenn mit diemuettigem vleiss, das wir den genantten irem swagernn und swesternn und allen iren baiden erbenn die obgemellt ir erbschafft und gerechtigkaitt in der bestimmbten wisen mit irer zuegehorunng genadigklichenn geruechten zw bestatten und zw verleichenn. Uns hat auch die genantt Margrett erweist und unterrichtunng thann, das der vierttaill in der genantten wisenn ir rechts vatterlichs erb sey und patt uns auch mit diemuettigem vleiss, das wir ir den und mit samt dem gemelltn irem hauswirtt und iren baiden erben zw sampt den vorgemellten drein tailen genadigklich geruechten zw bestattenn und zw verleichenn. Allso haben wir dem genantten Casparnn, seiner hausfrawnn Margretten und allen iren baiden erbenn die obgemellten wisen ganncz mit irer zuegehorunng bestatt und verlichen, was wir in rechtleichenn daran bestatten und verleichenn sullen oder mugen, doch das man uns und unserm goczhaus alle jar jarlichenn davon raichen und dienn sol zw sand Jorigenn tag drey schilling Wienner pfenning. Es sind auch die obgenantten Hanns, Hainrich und Magdalenn geswistrett fur sew und all ir erbenn der obgemellten irer erbschafft und gerechtigkaitt in der beruertten wisen mit irer zuegehorunng des genantten ires swagern Casparnn, seiner hausfrawnn Margretten und irer baider erbenn recht gewernn und furstannt fur alle rechtleiche ansprach wo und wann in des not und durfft beschiecht mit dem rechten alls dann solichs kauffs unnd lanndes ob der Enns recht ist angevar. Wir offenn auch, das sew kainerlai wanndlunng damit nicht habenn sullen in kainerlai weiss an unnser hanntt und guetten willen und sullen uns auch alles das davon leydenn und dullden, das annder unnsers goczhaus erbler gein uns leydentt und dulldentt unverczigenn unsers goczhaus rechten in allen sachenn. Zw urkundt gebenn wir in des allso den offenn brieff besigellten mit unnserm anhanngunden innsigll, der gebenn ist alls man zallt nach Cristi gepurd vierczehenn hundertt und im newnnundachczigistenn jarenn an mitichenn nach sand Scolastica tag der heyligenn junkchfrawenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 251f, Nr. 3207