Dem erwirdigenn und geistlichen herren herrn Johannsen, abbt zw Lambach, embeutt ich Petter auffm Pogksrugk gesessenn und ich Margrett, sein hausfraw, unnser unnttertanig gehorsam dinst zuvor, und fuegen ewrnn genaden zw wissen, das wir recht und redlichenn verkaufft habenn all unnser baider erbschafft und gerechtigkaitt, so wir ungevarlichenn gehabt haben an den dreynn viertaillenn in dem Obermairguett auf der Ruepellczreutt mit seiner zuegehorunng in Tauffkircher pfarr gelegenn, das dann ewernn gnaden und ewr gnaden wirdigen goczhaus urbar und dinstparigs guett ist, und haben die gegebenn Wolfganngen auf dem gemellten guett gesessenn, seiner hausfrawnn Anna und allen irenn baiden erbenn umb ain summa gellts, der wir von im ganncz und gar ausgericht und beczallt wordenn sein zw rechtn tagen an allen schadenn. Auf solichs patten wir ewr gnad mit aller unttertanigkaitt alls unnserm genadigenn herren welle dem genantten Wolfganngen, seiner hausfrawnn Anna und allen iren baiden erbenn umb solhenn vorgemellten kauff ain gewonndlichenn kauff brieff nach gewonnhaitt ewrnn gnaden goczhaus verferttigenn und bestatten. So das beschehenn ist, globen wir ewrnn gnaden hiemit in krafft des brieffs mit unnsern trewn [...] furpaser in ewrn gnaden brieff, sigll und [...] denn noch dawider ze thuenn in kaine[...]d ungevarlichenn. Zw urkundt geb[en wir ewrn gnaden des allso] den offenn pettzettl, pewartt mit [des erbern weisen Kollman All]tenhofer ambtman ze Gaspac[zhoffenn aigen zw rugk aufgedrukchten] pettschafft, den wir [...] sein hausfraw mit [vleiss gepetten haben, doch] im und sein erbenn an scha[den. Zewgenn der gepett umb] das innsigl und pettschafft [sein die erbernn ...]ttmullner, Liennhartt Lewttl von Sa[...]rttner und annder erberger lewt [... Geschehenn an] freyttag nach sand Paullstag seiner be[kehrung anno domini etc.] im newn undachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 250f, Nr. 3206