Dem erwierdigen geystlichen herren herrn Johannsen, abt zw Lambach unnserm genadigen herren enpewt ich Waltpurga der Wolfganng auff der Lewtten etben gesessen in Otzpekcher phar saling elichen tochtter unnd Pettern zw Smidhaim auss Unkchnawer phar eliche hausfraw mein willig unnd gehorsam dienst bevor. Ich fueg ewern genaden zw wyssenn, das ich recht und redlich verkaufft und kaufflich zw kauffen geben hab dem erbern Joring Sterer zw Riczling auss Otzpekcher phar, Anna seynner hausfraun und allen iren payden eriben und Wolfgangen Huebmer zw Hochrain auss Unkchnawer phar und Dorothea seynner hausfraun und alln irn payden eriben, und Ulreichen und Magdalena des Leonnharttenn Lewttner auff der Lewtten inn Otzpekcher phar elichen kinder und allen irn eriben meinen geleichenn eribtaill, so ich ungeverlich gehabt han an dem guetlein zw Weygenshaim mit aller zuegehorung und pringt ain funfftaill unnd gehordt mit der herschafft ewrn genaden und ewern genaden gotzhawss zue umb ain summa gelt, der ich von inn zw rechten tagen an allen schaden recht und redlich schon bezalt pin worden. Unnd sendt ewrn genaden darumben die offen petzettel und pit euch mit sundern vleys, ewr genad well den obgenantten ein gewondlichen landtleufing kauffbrieff nach gewondhait ewrn genaden gotzhawss darumben geben und mit ewrn genaden insigel ververtigen und bestatten. Und so ewr genad den das gethan hat, so gelob ich ewern genaden in ewr brieff unnd sigel auch vertigung nicht zw reden noch anders inmandt von mein wegen pey meinen trewn aydes weyss alles treulich ungevarlich, unnd senndt ewrn genaden darumben die offen petzettel bewardt durch meyner vleyssigen gepet willen mit der erbern und weysen Leonnhartten Vorster zw Egellaw, ewrn genaden ambtman, unnd Hannsen Haslinger burger zw Swanns, payder aygen aufgedruckchtten petschadt, doch in und irn payden eriben an schaden, auch unengolten ewrn genaden an ewrn diensten und vodrungen in allen sachen unvergriffenlich, darunter ich mich fur mich und all mein eriben pey meinen trewn aydes weys verpindt alles war und stat zw haltten innhalt der petzettel. Zeugen der sachen und gepet umb die petschadt auch umb das insigel an dem kaufbrieff sind die erbern Caspar ambtman zw Kalttenprun, Thaman Marschalich zw Strebenperig, Hanns Watmair ze Aich auss Swannser phar, unnd annder erber lewdt meniger. Geben nach Cristi unnsers herren gepuerdt tausent vierhundert und darnach in newn und achzigisten jar an freytag vor sand Matheustag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 279-281, Nr. 3230