Ich Linnhartt, Merttann Kaufman weylenntt zw Griesskirchenn gesessen saling sun, bekenn fur mich, all mein erbenn und thuenn kundt offennlichen mit dem brieff allen, den er furkumpt, alls mir der erwirdig und geistlich mein genadiger und lieber herr her Johanns, abbt zw Lambach, alls gruntther auf mein und ander erberger leutt vleissigenn gepett zw freysacz und rechter freystifft lassen hat die huebm mit irer zuegehorung zw Pabmperg genantt die Humpplhuebm in Puchler pfarr gelegenn, auf solichs hab ich obgenantter Liennhartt dem bemellten meinem genadigen herren von Lambach mit meinen trewnn an aidestatt globt und versprochenn in krafft des brieffs, das ich die gemellt huebm mit irer zuegehorung nicht anders innhaben, nuczen und niessenn soll noch will wenn zw freysacz und rechter freystifft, die weill ich die von genaden und seiner gnaden nachkomen gehaben mag und mir die von in nicht aufgesagtt und soll die allenthalbm stifftlich und peylich hallten und legenn und sullenn dem gemelten goczhaus alle jar jarlichenn davon raichenn und dienn nach innhallt lautt und sag des gemellten goczhaus urbarpuech, und soll und will in auch allczeitt damit trew gehorsam und gewarttig sein und alles das gein in leydenn und dullden, das ander ir behaust hollden und hindersassen gein in leydentt und dulldentt unverczigenn ires goczhaus rechten in allen sachenn, und das solichs alles wie vor begriffenn ist, von mir obgenantten Liennhartten war und statt gehallten werde, dar umb hab ich sein gnaden zw porigenn geseczt die erbernn Asm ze Hollczarnn, Wolfganngen ze Tunsting, Liennhartten Polkchen ze Pichell zw Nidernnhollczarnn, Michelln ze Gassing, Jorigen ambtman zw Eczleinstorff, Liennhartten Pekchen ze Puhell, die dann mit sampt mir dem genantten meinem genadigenn herren von Lambach mit iren hannttgeben trewnn gerett, gelobt und versprochenn haben damit solichs alles getreulichen gehallten werde angevar. Zw urkundt gib ich sein gnaden des allso den offenn brieff, versorigt mit des edllnn und vesstenn Kristoffenn Oberhaimer zw Irennhartting und des edllnn Hannsen Leroch am Stadll baider aigenn zwrugk aufgedrukchten pettschafftenn, dew ich obgenanter Liennhartt mit vleiss dar umb gepetten hab, doch in, iren erben und pettschafften an schadenn. Geschehenn an freyttag vor sand Jacobstag des heyligenn zwellfpotten anno domini etc. im newnnundachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 278f, Nr. 3229