Dem erbirdigen und geistlichen herrn herrn Johanns abpt zw Lambach empewt ich Warbara, des Wolfgang Aichmayr in Lachircher pfarr saligen tachtter mein willig und gehorsam dinst all zeyt bevor. Ich fug eurn genaden zw wissen, das fur euch chomen wirt Lienhart Teuffell auf dem Holcz inn Lachircher pfarr und Katrey sein hausfrau, unnd wirt an ewr genaden und wirdigchayt werben ainnenn chauff brieff ym, seiner hausfraun und yren peden eriben uber das guet zw Diethaming, genandt das Swaczenguet gelegen inn Lachircher pfarr, das denn dinstparig ist dem erbirdigen goczhaus zw Lambach. Bit ich euch mit pesunderm vleiss, eur genad well dem vorpemeltten Lienhartten dem selbigen chauf pestatten mit euren insigel. Und so yr das gethann habt, so gelob ich vorpenenter Warbara mit sambt mir all mein eriben euch und euren genaden nachkomen in ewr pestattung unnd innsigel nicht reden schollen noch wellenn in chainerlay weiss ann gevar. Des zw urchundt gib ich vorgemelttew Barbara fur mich und all mein erben ewren genaden und nachkomen dy offen petczettel pestat mit der erbern weissen Erhart Schawnburger, dy zeyt ambtmann auf der Salvogthey, und Chuncz zw Elling payder aufgedruchtten petschafft, dew ich mit vleiss dar umb gepetten hab doch in unnd yren eriben an schaden. Des sindt zewgen dy erbern weissen Wolfgang zw Mass in Lachircher pfarr, Singmundt Vorcher und Hanns zw Weickartting unnd annder erber leyt mer. Geben am newen jar nach Christi gepurdt im newn und achctzickisten jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 238f, Nr. 3197