Dem erwirdigen in Got und geystlichn herrn herrn Johannsen, abbt zu Lambach, meinem genadigen und lieben herrn enbeutt ich Michel Poserll, vleischackher, weilend burger zu Lambach und yecz wonhaft zu Eferding mein undertanig gehorsam dinst zwor und fueg ewern genaden zu wissen, das ich dem erbern Thoman Hager, ewer genaden burger zu Lambach, seiner hausfrawn Magdalena und allen iern baiden eriben recht und redlich verkauft hab das haws, hofstat und hofmarch mit seiner zugehorungen innhallt meines allten khauffbriefs, so ich vormals darumb hab, das dann ain tafern ist in ewer genaden marckht und purckhfridt ze Lambach gelegen zwischen Hannsen Hintterpeckhen und des newen Hannslein, das ich selbs gepawtt hab. Hierauf bitt ich ewr genad mit allem undertanigem vleys als meinen genadigen und lieben herren, wellet mit ewer genaden anhangunden insigel dem egemelten Thoman Hager, seiner hausfraun Magdalena und allen ieren baiden eriben ain gewondlichen landleuffigen khauffbrief verferttigen und bestatten, ist mein gutlich will. Und so das beschehen ist gelob ich ewren genaden hiemit und in kraft des briefs fur mich und all mein eriben furpaser in ewer genaden brieff, sigll und bestattung nichts zu reden noch dawider ze thun in khainerlay weys, sunder in undertaniger gehorsam umb ewr genad zu verdiennen getreulich und ungeverlich. Zu warem urkunde dits offen petbrieffs bestatt durch sunder meiner vleissiger pete willen mit des edeln vessten Sigmund Utzinger zu Wildnnhag an der zeit statrichter zu Eferding aigen ze ruckhaufgedruckten petschaden, doch iem, seinen eriben und petschadten an schaden, darunder ich fur mich und all mein eriben mit meinen trewen aidesweys verpinde stat zu hallten, volfuren und ingedenckh zu sein innhallt des pet und kauffbrieffs. Zeugen gepets umb das petschadt sind gewesen Anndree Gruennmawer, burger zu Eferding, Ulrich Sneyder, Leonhart Mesnoder, Mert Weydl, all drey burger zu Lambach und ander leutt mer. Geben zu Eferding suntags sand Anndreen des heyling zwelfpoten tag nach Kristi geburd vierczehenhundert und achtundachtzigisten jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 237f, Nr. 3441