Raimundus Peyraudi, ecclesie Xanctonensis administrator, magister in theologia, sanctissimi domni nostri pape prothonotarius ac referendarius domesticus ad Alamaniam universaque et singula provincias, civitates, terras et loca Germanie sacro romano imperio et illius electoribus etc. subiecta eiusdem sanctissimi domni nostri pape et apostolice sedis cum plena potestate legati de latere, nuntius et orator universis christifidelibus presentes litteras inspecturis salutem in domino sempiternam. Quoniam, ut ait apostolus, omnes stabimus ante tribunal Christi recepturi prout in corpore gessimus sive bonum sive malum fuerit, oportet nos diem extreme messionis misericordie operibus prevenire ac internorum intuitu seminare in terris, quod concedente domino cum multiplici fructu recolligere valeamus in celis firmam spem fiduciamque tenentes quoniam, qui parce seminat parce et metet et qui seminat in benedictionibus de benedictionibus et metet vitam eternam. Cupientes igitur ut ecclesia monasterii in Lambaco ordinis sancti Benedicti Pataviensis diocesis congruis frequentetur honoribus ac in suis structuris et edificiis reparetur, conservetur et manuteneatur necnon Christi fideles eo libentius devotionis causa ad eandem confluant ecclesiam ac ad premissa manus promptius porrigant adiutrices, quo ex hoc ibidem dono celestis gratie uberius conspexerunt se refectos supplicationibus venerabilis viri Johannis dicti monasterii abbatis inclinati auctoritate litterarum sanctissimi in Christo patris et domini nostri domini Innocentii divina providentia pape viii. nobis super hoc concessarum omnibus et singulis utriusque sexus personis vere penitentibus et confessis dictam ecclesiam in assumptionis beate Marie virginis, sancti Kiliani episcopi et martiris ac beati Adalberionis ipsius monasterii fundatoris necnon dedicationis eiusdem ecclesie festivitatum seu celebritatum diebus devote annuatim visitantibus et ad premissa manus adiutrices porrigentibus singulis festivitatum seu celebritatum huiusmodi diebus centum dies de iniunctis eis penitentiis misericorditer in domino relaxamus presentibus perpetuis futuris temporibus duraturis. In quorum fidem et testimonium presentes literas fieri nostrique sigilli iussimus et fecimus appensione muniri. Datum Lintz Pataviensis diocesis anno domini millesimo quadringentesimo octuagesimo nono sextodecimo kal. februarii pontificatus eiusdem sanctissimi domini nostri pape anno sexto.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 244f, Nr. 3202