Dem erwirdign in Got herrnn herrnn Johannsn, abbte zu Lambach, unserm gnedign herrnn embietn ich Sigmundt Hochreitersperger, ich Elspeth, ich Agatha und ich Barbara alle viere geschwistred und weilennt Petern Hochreitersperger, burgers zu Gmunden seling kinder, unser diennst in guetm willen bevor. Fuegn ewern gnaden zu wissen, das wir alle und jegliche unser erbliche gerechtigkait, so wir auf dem guet genant die Hutten in Kirchaimer pfarr bey der Lauttach gelegn gehabt, dem beschaidn Wolfganngn Hochreitersperger zu Hochreitersperg in Lakircher pfarr, unserm liebn vettern, allen iren zuegehorungn verkauft haben, dasselb halb guet dan ewern gnaden diennstper ist, bittn wir ewer gnaden unserm gnedign herrnn in allem vleis, welle vermeltm Wolfganngn Hochreitersperger und allen seinen erben ain gwendlichn und lanndlewffign kaufbrief darumben und daruber vertign und bestetten, so ewr gnaden das getan hat, geben wir ewern gnaden und all ewern gnaden nachkomen fur uns und all unser erben in ewr gnaden insigl und vertigung nicht zu reden, hanndeln noch tun, sonnder welln ewern gnaden darinn an schaden halten. Mit urkunt des betbriefs bewarten umb unser obgenanten geschwistred vleissiger [bet]e willen mit des edlen Hannsn Gawndlstarffer phleger aufm Guglperg, und mit des ersamen weisen Hannsn Sauber ambtman zu Lakirchn beder hie aufgedrugktnn betschaiden, in baiden und allen inen erben an schaden. Geben an dem heilign auffartabennt anno etc. lxxxviiii[no].

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 275, Nr. 3225