Universis et singulis presentes literas inspecturis. Raymundus Peraudi, archidiaconus Aluisiensis in ecclesia Xanctonensi, sacre theologie professor, sedis apostolice prothonotarius ac sanctissimi domni nostri pape referendarius domesticus ad Almaniam universaque et singula provincias, civitates, terras et loca Germanie sacro romano imperio illiusque electoribus et subditis ubilibet subiecta, necnon Dacie, Suecie Norwegie, Livonie, Prussie et Russie regna ac insulas et provincias et alia dominia, terras atque loca illis adiacencia, cum plena potestate legati de latere, orator, nuncius et commissarius apostolicus salutem. Notum facimus, quod sanctissimus in Christo pater et domnus noster dominus Innocencius papa octavus et modernus concessit omnibus et singulis utriusque sexus christifidelibus pro tuicione orthodoxe fidei contra Turcos eiusdem fidei inimicos iuxta ordinacionem nostram manus adiutrices porrigentibus preter iubileum et alias indulgentias, gracias et facultates, quas christifideles ipsi obtinere possunt visitando ecclesias per nos aut commissarios nostros deputandas ac si visitassent basilicas urbis tempore iubilei prout in literis apostolicis desuper confectis plenius continetur, quod possint eligere confessorem ydoneum secularem vel regularem, qui eis semel in vita ab omnibus et singulis peccatis, excessibus, criminibus et delictis etiam sedi apostolicae generaliter vel specialiter reservatis, absolucionem plenissimam impendere, ab aliis vero eidem sedi non reservatis vita eis comite tociens quociens eos absolvere et in mortis articulo ac etiam tociens quociens de eorum morte dubitatur, etiam si tunc eos decedere non contingat, plenissimam omnium peccatorum suorum remissionen eis impatiri valeat. Indulsit eciam sancissimus dominus noster motu proprio omnes et singulos christifideles huiusmodi ac eorum parentes et benefactores defunctos, qui cum caritate decesserunt in omnibus precibus, suffragiis, missis, elemosinis, ieiuniis, oracionibus, disciplinis et ceteris omnibus spiritualibus bonis, que fiunt et fieri poterunt in tota universali sacrosancta Christi ecclesia militante et omnibus membris eiusdem in perpetuum participes fieri, et ne super premissis a quoque verti possit in dubium, voluit ipse sanctissimus dominus noster, quod presentibus nostris literis tanta adhibeatur fides quanta adhiberetur, si sub bulla sua plumbea expedite forent, necnon easdem sub quibuscunque generalibus vel specialibus de similibus graciis et facultatibus emanandis revocacionibus et suspensionibus nullatenus comprehendi debere, et quia venerabilis ac devoti nobis in Christo sincere dilecti Johannes abbas, Pangracius prior, Wolfgangus Gletzinger, Thomas, Andreas, Symon, Benedictus senior, Stephanus, Benedictus iunior, Egidius, Martinus, Maurus, Wolfgangus iunior, Paulus, Johannes de Hofkirchen, Placidus, Jorius, Michael, Johannes de Meyssa, Johannes de Lyntz, Heinricus conversus et Johannes conversus fratres monasterii sancti Kiliani, ordinis s. Benedicti in Lambach Pataviensis diocesis professi ad ipsius fidei piam subvencionem et defensionem iuxta summi potificis intencionem et nostram ordinacionem prout presentes literas ipsis in huiusmodi testimonium a nobis traditas approbamus de suis bonis contulerint, ideo auctoritate apostolica nobis commissa ipsis ut dictis, graciis et indulgenciis uti et gaudere possint ut valeant concedimus pariter et indulgemus. Datum sub sigllo nostro ad hoc ordinato die decimanona mensis decembis anno ab incarnacione domini M^o CCCC octuagesimonono. Forma absolucionis in vita tociens quociens Misereatur tui etc. Dominus noster Jesus Christus per meritium sue passionis te absolvat auctoritate cuius et apostolica michi in hac parte commissa et tibi concessa, ego te absolvo ab omnibus peccatis tuis, in nomine patris et filii et spiritus sanctus. Amen. Forma in vita semel et plenissime remissionis et in vero mortis articulo vel verisimili Misereatur tui etc. Dominus noster Jesus Christus per meritum sue passionis te absolvat et ego auctoritate ipsius et apostolica michi in hac parte comissa et tibi concessa te absolvo primo ab omni sentencia excomunicacionis maioris vel minoris si quam incurristi, de inde ab omnibus peccatis tuis contritis confessis et oblitis conferendo tibi plenissimam omnium peccatorum tuorum remissionem remittendo tibi penas purgatorii in quantum claves sancte matris ecclesie se extendunt. In nomine patris et filii et spiritus sancti. Amen.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 285-287, Nr. 3234