Dem erwirdigen in Got hernm hern Jo[hannsen, abbt zu Lam]bach unserm gnedign herrnn embietn ich Peter Stapfner [burger zu] Gmunden und ich Margreth sein hawsfraw unser diennst in guetm willn bevor. Wir haben Casparnn Hoffmaister, burger zu Lambach und seiner hawsfrawen ain halbs jeuch akher zu Lambach im burgkfrid in dem Swaigfeld zwischen des Augustin unsers swager und brueder und des Liennhartn Strohamer akher undtn an die sag ruerendt mitsambt dem wisflekh und krautgartn gelegen, recht und redlichn verkauft, bitten ewr gnaden unsern gnedign herrnn welle benantn kannlewtn und allen iren beden erben ain gewondlichn kaufbrief mit ewr gnaden insigl vertign und besiglnn. So ewr gnaden das getan hat, globn wir ewr gnaden und all ewr gnaden nachkomen fur uns und all unser erben in ewr gnaden insigl und vertigung nicht zu redn, hanndln noch tun, sonnder welln ewr gnaden der vertigung halbn an schaden haltnn. Mit urkunt dits betbriefs bewartn mit meines obgenanten Petern Stapfner hier aufgedrugktn betschade und umb unser bederr kannleut vleissiger bete willen bezeugt mit des erbern Cristan Helmperger statschreiber zu Gmunden auch hie aufgedrugktnn betschade, im und allen seinen erbn an schaden. Geben on mittichen vor dem newen jarstag anno etc. nonagesimo.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 287f, Nr. 3235