Cristofferus dei gracia episcopus Pataviensis ad futuram rei memoriam. Pastorali cura conmoniti ad ea oculos nostre mentis convertimus, que divinum cultum animarumque cristifidelium salutem augere dinoscuntur venerabilis itaque patris domini Johannis abbatis monasterii Lambacensis ordinis sancti Benedicti nostre diocesis peticionibus, que divino cultui non parum conducere videbantur inclinati, diem sancti Benedicti abbatis, cuius sancta vita etiam post mortem miraculis coruscans posteris non parum spei salutis tribuit ordinaria nostra auctoritate et ex certa nostra sciencia in et sub limitibus ecclesie parrochialis Lambacensis tam in choro quam in foro festivum statuimus et pronuncciamus mandantes patri Johanni abbati, priorique et conventui monasterii Lambacensis predicti et successoribus eorundem ceterisque presbyteris sub limitibus predicte ecclesie constitutis, quatenus singulis futuris temporibus diem sancti Benedicti populo Christi sic ut premittitur in choro et in foro celebrem et festivum observari pronuncciant et demandent, eamque festivitatem in ecclesiis dei cantu et ceremoniis consuetis devote et solempniter observent et festinant. Et ut fideles Cristi muneribus quibusdam allectinis ad id invitemus, omnibus et singulis vere penitentibus confessis et contritis, qui inprimis vesperis eiusdem festi demum officio diei et in secundis vesperis interfuerint, de omnipotentis dei misericordia ac beatorum Petri et Pauli apostolorum eius suffragiis confisi, de quolibet videlicet primis vesperis officio summo ac secundis vesperis quadraginta dies criminalium octuaginta venialium de iniunctis eis penitenciis misericorditer in domino relaxamus. Harum testimonio literarum datum sub nostro appenso sigillo die duodecima mensis novembris anno domini millesimo quadringentesimo nonagesimo.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 304f, Nr. 3248