Cristofferus dei gracia||
episcopus Pataviensis

Favorabili salutacione premissa, venerabilis devote in Christo sincere dilecte. Accepimus nuper, que tue devocioni in itinere quo minus ad nos proficisci posses incomoda evenerunt et volumus profecto huiusmodi perpessorum laborum tuorum et tue in nos promptitudinis ac observancie, si umquam vices rependere debebimus graciose meminisse, preterea feria quarta post Dorothee proxima ventura omni modo continuanda et perficienda est in monasterio Nideraltah instituta nostra visitacio, ad quam eciam accedit consensus principis ducis Georii. Quapropter devocionem tuam hortamur iterum et rogamus plurimum velit adesse hic nobiscum die lune antea iter arripere et una nobiscum expedicioni ipsi intendere in nobis gratissimam neque obstat vel obstabit quiscumque in futurum prelatum ipsius monasterii forsan heri electus est, decessit enim senior abbas et feria sexta post conversionem Pauli statutus fuit dies electionis misimus nos ad electionem confratrem nostrum doctorem Lachmair, qui non dum rediit et ipsa feria quarta post Dorothee nichilominus visitationem perficiemus, cui ut adesse velitis iterum et iterum rogamus. Ex Patavia sabato post conversionis Pauli anno lxxxxi