Erwirdiger geistlicher genadiger herre mein willig dinst bevor. Als mir weylend Wolfganng Fleischacker ewr burger zw Lambach xiiii tl. pfening umb vier okhsen schuldig wardn, derhalbn ich euch klaghafft wardn, darauf ir euch auch ewr hoffrichter Christoff Oberhaymer erbottn, von des selbn Fleischacker gelassn gutt zallung ze schaffn, aber nicht beschehen, daruber ich mich persondlich zu euch verfuegt und angeruefft, mich meiner vermeltn schuld schaffn zu bezalln, habet in unnder anndern warttn an mich begert, ew di schlud ansten ze lassn, wellet mich der zu bezallen, das ich ew zu gevalln guttwillig than. Nachmalln euch deshalbn geschribn, bin ich in verschriben antburtt von euch ausgangen bricht, das ir solhs begern an mich tan nicht ingedenckh noch wissn habn wellet, vermainet auch mein gellter nicht ze sein. Nach dem hab ich euch mit kayserlichn geschafften ersuechen lassn, di ir auch veracht und den in ungehorsam nachgangn. Wie dem bin ich noch untzbeiflich werdet gedachtig sein aller handlung und rede als ich anfangkhs der sachen bey euch gbesn, und welhermass ich durch ew abgeschidn bin, bitt ewr gnad mit sunderm vleitze welle noch meiner schuld obgemellter suma gelts, der ich ewr gnad fur meinem zaller beken, genadigklich bezalln, der erlittn schadn halben will ich mich nachmals guttlich bebeisn. Das wil ich zu sambt der pilligkait uber ewr gnad verdienen. Soverer ewr gnad mir nicht bezallung und ausrichttung thun wurde, ervordert mein notturfft uber solhs rat zu haben mich umb haubtsuma und scheden gegen ew und ewerm gotzhawss wie mich recht erberndt ze haldn, das ich in warhait lieber vermittn belibe, ewr gnad geruche mich des zu vertragen ewr gnadn verschribn antburtt. Datum suntag vor Pangracii anno domini etc. im lxxxxi.

Wolfgang||
Hewpacher