Erwirdig und geistlich liebn herrn mein willig dinst bevor. Ich fueg ew ze wissen, das mir weillenndt Wolfganng Fleischacker, purger zw Lambach, xiiii tl pfening umb vier okhsn schuldig wordn, derhalbn ich meinem gnadign herrn vonn Lambach, auch seinen verordntn hoffrichter Christoffn Oberhaimer klagt, die sich von desselbn Fleischackr gelassn gutt bezallung ze schaffn erbottn, aber nicht beschehn, deshalb ich mich zu meinen herrn von Lambach persondlich verfuegt und gebettn dar ob ze sein, damit ich solher schuld bezallt werde, darauf er mir der witiben armuet und unrecht zu sten furgehaltn, mich gebetten in der schuld porgn und ansten ze lassn. Well er mich betzalln, das ich im zu gevalln tan. Nachmals hab ich inn solher bezallung schrifftlich ermont, bin ich durch sein antburt, mir auf mein schreiben than, bricht, das er nicht bekhantlich sein welle, diss begerns, der pitt halb an mich tan, vermainet auch mein zaller nicht sein, daruber ich inn mit kayserlichen geschafften ersuechen lassen, di er auch veracht. Schreib im ytz aber mall des handel und zallung halbn in hoffnung werde noch ingedenckh aller rede und abschidts, als ich anfangks bey im gbesn, bitt ew all und yedn besunder mit vleiz, wellet bey im verfuegen und daran weisn, damit ich von im bezallt in grosser schadn, mue und zerung nicht gelayt werde, das wil ich womit ich mag umb ew und das wirdig gotzhawss Lambach verdienen, soverer aber das nicht beschiecht, muess ich aufs obligunder meiner notturfft weg gedenkhn und furnemen da durch ich haubtsuma und schedn betzallt und benuegig werde, mich derhalbn gegn dem gotzhawss, wie recht ist, halden, des ich lieber entladn belibe ewrer verschribne antburt. Gebn suntag vor Pangracii anno domini etc. im lxxxxi.

Wolfganng||
Hewpacher