Ich Cristoff Oberhaimer zu Yrnnharting, der zeit hoffrichter zu Lambach, bekhenn fur mich und all mein erbn mit disem offen brieve, wo der furkumbt, das ich umb gots und meiner seele hail willen den metzn habern und die zwo hennen vogtrecht, so ich auf dem lehn zu Obertapl in Puchler pfarr, darauf iets Taman Lechner sitzt, jerlichn gehabt, den armen durftign des spitals zu Gmunden und allen iren nachkomen recht und redlichn geaigent und ubergebn habe, gib in auch die wissenntlich in kraft des briefs der mainung, das ain yeglicher spitalmaister zu Gmunden mit dem berurtn metzn habern und zwain hennen jerlichs dinsts und vogtrechts und mit allen andern gerechtigkaiten, so ich obrigkaithalbn oder in ander wege auf benantm lehn zu Obertopl gehabt, all und jeglich der armen durftign und des spitals nutz und frumen betrachtn mogn, demselben spital einnemen nutzn und niessen freilichen damit hanndln und thun als mit andern des spitals und der armen durftign freien und aigen guetern darinn solln noch welln ich noch mein erben in khain irrung thun, sonnder der benanten vogtey und aller gerechtigkaiten auf benantm lehn zu Obertopl hiemit vertzign sein. Ich vorbenanter Cristoff Oberhaimer und all mein erben seinn auch solher ubergab vermelter vogtey und jerlichs dinsts des metzn habern und zwaier hennen benants spitals der armen durftign darinnen und aller irer nachkomen recht gwern und furstanndt fur all rechtlich ansprach als dann solher ubergab und lanndes in Osterreich ob der Enns recht ist. Ging in aber in rechtlicher gwerschaft icht ab, das welln und solln wir in richttig machn trewlichn und angeverde. Der zu warer urkunt gib ich in disen brief besigltnn und bestet mit meinen obgenanten Cristopfn Oberhaimer aigen hie anhanngenden innsigll. Geben nach Cristi unsers liebn herrnn geburde tausent vier hundert und im ainsundnewnnzigistnn jarenn pfintztags on unser liebn frawen tag concepcionis.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 326f, Nr. 3268