Dem erwirdigenn in Gott und geistlichenn herren hern Johannsen, abbt zw Lambach, unnserm genadigenn und liebm herrenn, embietten wir Steffann Feschmayr und Breyd, sein hausfraw, unnser dinst in aller gehorsam und unnttertanigkaitt zuvor und fuegen ewrnn gnaden zw wissenn, das wir recht und redlichenn verkaufft und zw kauffen geben haben Hannsen Heyssenn ze Pasching gesessenn, seiner hausfrawnn Margretten und allen iren baiden erbenn all unser erbschafft und gerechtigkait, so wir baide ungevarlichenn gehabt habenn an und auff dem hoff mit seiner zuegehorung, genantt der Poschhoff in Paschinger pfarr gelegenn, der dann ewr gnaden goczhaus urbar und dinstparigs guett ist, und bitten ewr gnad mit allem diemuettigem vleiss alls unnsern genadigenn herrenn, wellett den genantten Hannsen Heyssenn, Margretten seiner hausfrawnn und allen iren baiden erbenn umb solhenn vorgemellten kauff ain gewonndlichenn lanndtleuffigen kauffbrieff nach form und gewonnhaitt ewr gnaden goczhaus verferttigenn und sigelln, so das geschehenn ist, globm wir ewr gnaden hiemit in krafft des brieffs fur uns und all unnser erbenn mit unnsern trewnn furan in ewr gnaden innsigll und bestattunng nicht zw redenn noch da wider ze thuen in gar kainerlay weiss angevar. Mitt urkundt des brieffs besigelltenn durch unnser vleissigenn bett willen mit der ersamen [und] weisenn Fastasienn Hawsrugker an der zeitt stattrichter zw Lynncz, und Hannsen [Hittinger] stattschrreiber [daselbst bai]der aigen zw rugk aufgedruck[ten insig]ellnn, [doc]h in und irenn erbenn [an schaden. Ge]benn zw Lynncz an mittich[en ...] anno domini etc im zway und [newnzigisten] jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 366f, Nr. 3301