Dem erwirdigen in Gott und geistlichen herrn herr Johansen abbte zu Lambach, unnserm gnadigen herrn empewt ich Fridrich Voittsperger, ich Hanns, ich Anna, des Fridrich Voitsperger eliche kinder, und ich Anna und ich Margreth, des obgenantn Fridrich Voittsperger enenckl unnser gehorsam willig dinst bevr. Wir fuegen ewch zu wissen, das wir all unverschaidenlich all unnser erbschaft und gerechtikait, so wir gehabt habm an und auf dem Voitsperg in Puchlar phar gelegen in Starhemberger landtgericht und ist urbar und dinstpar ewren gnaden, zu statem ewigen kawf zu kawffen gebm dem erbern Jorg Kefer im Sultzpach, Margrethen seiner hawsfrawn und allen iren baiden erbm, dy sy habm oder noch gewingen. Darauf bittn wir all ainhelligklich, ewr gnad mit allem vleis welle demselben Jorg Kefer, seiner hawsfrawn und allen irn erbm ain genuegsamen landtlewffigen kawfbrief daruber verfertigen, und wan ir das gethan habt, so geloben wir ainhelligklich ewren gnaden fur unns und all unnser erbm in ewr gnaden verfertigunng und insigl nicht zu reden wenig noch vill, sunder mit unnsern willigen dinsten umb ewr gnad verdiennen. Und des zu warm urkundt schickhen wir ewren genaden den offenn bettbrief, verfertigt durch unnser vlleissigen gepet willen mit des erbern weisen Wolfganng Hainpucher an den zeiten ewrer gnaden ambtman aufgedruckten petschadt, doch im, sein erbm und petschadt an schaden, under das petschadt wir uns all ainhelliklich verpinten fur uns und all unnser erbm bei unnsern trewen an aides weis alles das war und statt zu halten inhalt des betbriefs. Zewgen bittens umb ewr gnaden insigl an den kawfbrief und umb das petschadt sind di erbern Linhart Wolfslaher in der Od, Hanns Kornhueber, Linhart vom Pambperg und meniger genueg. Gescheen an pfintztag vor Urbani nach Christi gepurde viertzehenhunndert unnd im tzwaiundnewntzigsten jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 346f, Nr. 3283