Dem erwirdigen andachtigen in Gott und geistlichen herrn, herr Johannsen, abbte zu Lambach, unnserm gnadigen lieben herren, empewtt ich Ursula, des Linhartn Aichinger saligen gelasne witib, ich Sigmunnd, des obgemelten Aichinger saligen sun und nymb mich auch an gewalt fur mein zwen bruder Jorgen und Marxen, des egemeltn Aichinger eliche kinder, unnser gehorsam willig dinst bevor. Wir fugen ewren genaden zu wissen, das wir all unnser erbschaft und gerechtikait, so wir gehabt habm an und auf der hueb an der Hohenpirchen in Puchlar pharr in Starhemberger gericht gelegen und ist urbar euch und ewrer gnaden gotshawss zu statem ewigen kawff verkawft haben unnserm lieben vetern Hannsen Pirchinger, der hewslich darauf sitzt, Magdalen, seiner elichen hawsfrawn und iren baiden erbm, di habm oder noch gewingen, darauf bitten wir ainhelliklich ewr gnad mit sunderm allem vleis, welle demselben unnserm vettern, seiner hawsfrawn und iren erbm ain genuegsamen lanndtlewffigen kawfbrieff daruber verfertigen. Und wan ewr gnad das also hat, so geloben wir ewren gnaden fur unns und all unnserer erben in ewer gnaden verfertigung und insigel nicht zu reden wenig noch vill, sunder mit unnsern willigen dinsten umb ewr gnad verdienen. Und des zu warm urkundt schickhen wir ewren gnaden den offen bettbrieff, verfertigt durch unnser vleissigen gepett willen mit des erbernn Wolfganng Hainpuecher, an den zeiten ewrer gnaden ambtman aigen aufgedruckten petschadt, doch im, sein erben an schaden, under das petschadt wir unns all obgemellt fur unns und all unnserr erbm verpinten bei unnsern trewen an aides weis alles das war und stett zu hallten inhalt der bettzetel. Zewgen bittens umb ewr gnaden in sigl und umb das petschadt sind di erbern Wolfganng Aichinger, Mertan Schrabmair, Jorg Vaschang und meniger genueg. Geschehen an montag nach Pangracii nach Christi gepurd viertzehenhunndert unnd im tzwaiundnewnntzigisten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 344f, Nr. 3282