Dem erwirdigen in Gott und geistlichen herrn herr Johannsen, abbt zu Lambach, unnserm genadigen lieben herrn, empewtt ich Hanns des Liennhartten Silber sun und ich Barbara sein eeliche hawsfraw, unnser gehorsam willig dinst bevor, und fuegen ewren genaden zu wissen, das wir ain drittaill an und auf der Pirhen, so wir emalln gekawft habm von Sigmunden und Veichten, unnsern vettern des Kuetopler saligen sun, mit aller zugehorung in Puchlar phar gelegen und in Starhemberger gericht, das dan urbar und dinstpar ist ewr gnaden gotshawss zu statem ewigem ubergab ubergebm habm unnserm lieben vettern Hannsen Pirhinger, der yetzund hewslich darauf sitzt, Magdalena seiner hawsfraw und iren baiden erben, dy sy habm oder noch gewingen. Darauf bitten wir ewr gnad mit sunderm allem vleis, welle demselben unnserm lieben vettern Hannsen Pirhinger, seiner hawsfraw und iren baider erbm ain genuegsamen lanndtlewffigen ubergabbrieff daruber verfertigen, und wan ewr gnaden das also gethan hatt, so geloben wir ewr gnaden fur unns und all unnser erbm in ewr gnaden verfertigung und in sigl nicht zu reden wenig noch vill in kainerlai weis, sunder mit unnsern willigen dinsten umb euch verdiennen. Und schicken des zu warm urkunnd ewer gnaden den offen bettbrieff, verfertigt durch unnser vleissigen gepet willen mit des erbern weisen Wolfganng Hainpuecher, der zeitt ewr gnaden ambtman aufgedrukten getschadt, doch im, sein erbm an schaden, under das petschadt wir unns obgemelte verpinten fur uns all unnser erbm bei unnsern trewen an aidesweis alles das war und statt zu hallten inhalt des briefs. Zewgen bittens umb ewr gnaden insigl an den ubergabbrief und petschadt an die pettzetel sind dy erbern Steffan wird zu Mekenhoffen, Sigmund Silber an der Lewtten, Jorg Vaschanng zu Gaspoltshoven und meniger genueg. Gescheen an mitichen vor sannd Thomans tag des heiling zwelifpoten nach Christi gepurd vierczehenhunndert und im tzwaiundnewnntzigisten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 364f, Nr. 3299