Dem erwirdigen und geistlichen herren herren Johannsen, abbt zu Lambach, meinem gnadigen herren empeut ich Anna, weilendt Gorgens Mulner zu Michelndorf in Kirchdorffer pharr saligen witib, mein gehorsam willig dinst bevor. Gnadiger herr, ich fug euren gnaden ze wissen, das ich verkaufft hab dem beschaiden Wolfgangen Greczmulner in der benanntten pharr, Kathrein, seiner hausfraun, und irer bayder erben mein erbliche gerechtikait, die ich gehabt hab an und auf sandt Gorgen Perg, auch gelegen in Kirchdorffer pharr, ist dienstper eurem obbenanntten erwirdigen gotshaus, und bitt eur gnad mit allem vleis, wellet in daruber ainen kaufbrief verfertigen mit eurem anhanngundten insigl nach gewonhait eurs gotshaus. Gelob darauf euren gnaden bey meinen treun an aides stat also, das weder ich noch mein erbm noch ymandt annder von meinen wegen in eur insigel nichts einreden noch widersprechen wellen in kainerlay weise an gever. Des ze urkundt gib ich euren gnaden den pettbrief verpetschadt mit der erberen und weisen Sigmunden Gruber, dyzeit richter zu Kirchdorf, und Nicolaschen Puscher zu Michelndorf aufgedrukhten petschadten, die ich baid mit vleis darumb gepeten hab, doch in und iren erbm an schaden, der geben ist an phincztag sandt Franciscen tag nach Cristi gepurd viertzehen hundert jar und im zway und neuntzigisten jare.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 355f, Nr. 3291