Albertus, dei et apostolice sedis gracia episcopus Salonensis, reverendissimi in Christo patris et domini domini Cristoffori eadem gracia episcopi Pataviensis in pontificalibus cooperator, universis et singulis presentes nostras litteras inspecturis, lecturis pariter et legi audituris salutem in domino sempiternam. Noveritis, quod anno domini millesimo quadringentesimo nonagesimo secundo die vero Mercurii, que erat tercia mensis octobris, cappellam sancte Elizabeth vidue situatam in monasterio Lambacensi prope ecclesiam, que ex certis racionabilibus causis formidabatur execrata de speciali commissione et voluntate prefati domini nostri reverendissimi episcopi Pataviensis iuxta formam sancte matris ecclesie spiritus sancti gracia nobis suffragantibus rite et legittime dilligencia ac devocione, qua potuimus, duximus reconciliandam atque reconciliavimus, dedicacionem vero dicte prout retroactis temporibus et huiusque laudabiliter extitit celebrandam approbavimus. Cupientes igitur, ut cappella predicta cum altaribus eiusdem congruis frequentetur honoribus et a christifidelibus iugiter veneretur ac in suis structuris et edificiis debite reparetur, conservetur et manuteneatur ac luminaribus, calicibus, libris et aliis ecclesiasticis ornamentis divino cultui necessariis decoretur et decenter inveniatur in ea quoque cultus divinus augmentetur, utque christifideles ipsi eo libencius devocionis causa confluant ad eandem ac ad reparacionem, conservacionem, municionem, augmentacionem et alia premissa manus prompcius porrigant adiutrices, quo ex hoc ibidem celestis dono gracie uberius sese conspexerint esse refectos, nos de omnipotentis dei misericordia ac beatorum Petri et Pauli apostolorum eius auctoritate confisi omnibus et singulis utriusque sexus christifidelibus vere penitentibus confessis et contritis, qui dictam cappellam et altaria eiusdem in nattivitatis, resurreccionis et ascensionis domini nostri Ihesu Christi, penthecostes ac singulis gloriose virginis Marie, omnium sanctorum et corporis Christi, necnon ipsius cappelle patrociniorum et dedicacionis festivitatibus a primis vesperis ad secundas inclusive devote visitaverint et ad reparacionem, conservacionem et alia premissa manus porrexerint adiutrices, ut prefertur, de quolibet festorum predictorum quadraginta dies criminalium et octoginta venialium peccatorum de iniunctis eis penitenciis misericorditer in domino relaxamus futuris perpetuis temporibus duraturis. In quorum fidem et testimonium presentes literas fieri nostrique sigilli pontificalis iussimus et fecimus appensione communiri. Datum et actum anno, die et loco prenotatis.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 354f, Nr. 3290