Dem erwirding und geistlichen herrn, herrn Johannsn, abbt zw Lambach, unnsern genadigen herrn, enpieten wir ich Sigmund Smid zw Strass, ich Michell sein prueder, ich Sigmund, Stumbl zw Waidhawsen, ich Jorig, ich Hanns, ich Peter, ich Hanns, ich Marigreth, Liennharttn fleyschagker weyllent zw Strass gesessen saling gelassen wittib, ich Anna und ich Ellspet, allew geswisstredt und Pawllsn weyllent zw Obernderff saling gesessen gelassen kinder, unnser willig und gehorsam dinst sein ewrn genad mt aller underthanigkait zuvor. Wir fuegen ewrn genadn zw wissen, das wir recht und redlichen verkaufft und zw kawffen geben haben all unnser eribschafft und gerechttigkait, so wir gehabtt haben an dem lanndt agker, genandt die Luemgrueb in Gunskiricher veld und pfarr gelegen, und haben das zw kawffen geben unnserm lieben swagern Casparn zw Wallnsdorff gesessen, seiner hawsfrawn Ellspetn, unnser lieben swesster und muemen, und aller iren payden eribm umb ain sum gellts, des wir von in ganntz und gar awsgerichtt und beczallt sein worden zw rechten tagen an allen abganng und schadn. Allso piten wir ewr genad mit allem undertanigem vleyss, wellett in ainn kawffprieff von unns ausgeund und lawttund mit ewrer genadn insigl bestatten und ververttigen. Und so ewr genad das allso gethann hat, so gelobm wir ewrn genadn fur unns und all unnser eribm in ewr bestatt und insigl nichts ze redn, sunder das furan alltzeytt umb ewr genad undertanigklich verdien. Und des zw urkund sendn wir ewrn genadn hiemit den offen pettprieff, ververttigtt und bestatt mit des erbern und weysn Panngratzen Krabl, ewr genadn ambttman aigen aufgedrukchtten petschadtt, den wir mit vleyss darumb gepeten haben, doch im und sein eribm an schadn. Des kawffs und gepet umb ewr genadn insigl sind zewgen Jorig Obermullner zw Pawngartting, Hanns Hertzog auff der Haid, Schuech Hanns zw Strass. Der prieff ist geben am sambstag vor dem suntag reminiscere in der vassten anno domini etc. lxxxxiii jare.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 371-373, Nr. 3305