Dem erwirdigen in Got und geistlichn herrn hern Johannsn, abbte zu Lambach, meinem genedigen herren, embeut ich Asm Steiger, burger zu Gmundn, mein willig dienst bevor, und fueg eurn genadn zw wissen, das ich als gwaltrager an stat und von wegen meiner liebm swiger Magdalenen weilenndt Pettern Schiml, burger daselbs zu Gmundn saligen gelassen witib, auf verschriben gewallt, so ich von ir hab, recht und redlich verkauft und zu kauffn gebm hab meinem liebm swager Lienharttn dem Pondloder burger zu Wells, Anna seiner hausfrawn und irn baidn eribm ain wisen bey dem Gruennpach gelegn von weilendt Ulrichn dem Aicher saligen her rurundt, dy dann von eurn genadn und eurn genadn gotzhaus zu lehenn ist. Hier auf bitt ich eur gnad mit sunderm vlews als gwaltrager anstat der obenantn meiner swiger, ir wellet dem obenantn Pondloder, seiner hausfrawn und irn baiden eribm genuegsam brieflich urkundt nach gewanhait eurn genadn gothaus dar uber lauttundt, vertigen und bestaten und im dy genedigklich geruehenn zu verleyhenn. Und wann eur genad das also gethann, als gelob und versprich ich als gwaltrager an stat der obenantten meiner swiger und fur all ir eribm furann in eurn genadn insigill, vertigung, bestat und lehenschaft mit nichte zu redn, sunder alles war und stat zu haltn inhalt des briefs, den ich eurn genadn ze urkundt sennde besigeltn mit der erbern weisn Pangreczn Scheybl, an der zeit ainer des ersamen rats zu Wells und Steffann Lechner, burger daselbs, baider aigen aufgedrukhtn insigelln, die ich obenanter Asm Steiger mit sunderm vlews darumb gepettn hab, doch in und irn paiden eribm an schadn. Zeugn umb das gepett der insigl sein dy erbern weisn Hanns Hiersfelder, Jorig Rieder, Thoman Hofer, all drey burger zu Wells, und Wolfgangen Pagnsperger, statschreiber daselbs. Gebm nach der gepurde Kristi im vierzehennhundert und drew und newnzigisten jaren an mitichen vor dem suntag oculi in der heiligen vasten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 373f, Nr. 3307