Dem erwirdigen in Gott und geistlichen herrn, herrn abt Johann zu Lambach unnserm genadigen herrn, enpeut ich Ulreich zu Pramadorff und ich Anna dy Heyplin da selbs unsern willig untterdanigg dienst und fuegen eurn genaden zu wissen, das wir all unser eribschaftt und gerehtikait verkaufft haben, so wir gehabt haben zu Hintterschuzing in Swanser pfarr in dem aing gelegen und in des von Pollhaim gericht gein Warttenburg, und das haben wir geben unserer lieben muemen Margreten zu Schuzing und allen iren eriben und darumb pitten wir eur genad gar unttertanigklich, ewr genad well der obgenantten Margretten und allen iren eriben brief und sigl dar uber fertting, und wann eur genad nun das getan hat, so geloben wir euren genaden, das wir euren genaden eur wrief und sigl nicht reden wellen. Und des zu urkund geben wir eurn genaden den pett brief verpettschafft mit des erbern weissen Hannsen Storrer die zeit markch richter zu Hag aufgedrukchten pettschafft, der das durich unserer vleissigen pett willen auf den brief gedrukcht hat, doch im und sein eriben und pettschafft an schaden, pett und zeugen umb das pettschafft sind die erbern Lienhart Wielant, purger zu Hag, Michell Haffner purger daselbs, Taman Hausrukchgattern mer leut genueg. Der brief ist geben des freytag var mittervasten im lxxxxiii jar etc.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 375, Nr. 3308