Dem erwirdigen in Gott und geistlichen herrn herr Johannsen, abbte zu Lambach, meinem genedign herren, empewtt ich Barbara des Linhartten amb Weg in Rotenpekher pharr gesessen eliche hawsfraw mein gehorsam undertanig willig dinst bevor. Ich fueg euch zu wissen, das ich all mein erbschaft und gerechtikait, so ich gehabt hab an und auf dem Puchelguett zu Entarn und in der hueb zu Haslach in Gebaltzkircher pharr gelegen in Starhemberger lanndtgericht, das dan urbar und dinstparig ist euch und ewer gnadigen gotshaws, zu statem ewigen kawf verkawft hab meinem lieben bruder Wolfganng Puchler, Margrethen seiner elichen hawsfraw und iren baider erbm, dy sy habm oder gewingen. Darauff bitt ich ewr gnad mit allem sunderm vleis, welle demselben meinem lieben bruder Wolfganng Puchler, Margrethen seiner hawsfrawn und irn baider erbm ain genuegsamen lanndtlewffigen kawfbrieff daruber verfertigen, und wan ewr gnad das also gethan hat, so gelob ich ewren genaden fur mich und all mein erbm in ewr gnaden verfertigung, brief und insigel nicht zu reden wenig noch vill, sunder mit meinem willigen dinsten umb ewr gnad verdienen. Und des zu warm urkundt schickh ich euch den offen bettbrieff verfertigt durch meiner vleissigen gepett willen mit des erbern weissen Wolfganng Hainpuecher an den zeiten ewer gnaden ambtman aufgedruckten petschadt, doch im sein erbm an schaden, under das petschadt ich mich obgenante Barbara fur mich und all mein erbm verpint bey meinenn trewen an aydes weis alles das war und stett zu hallten, was der brief in hallt. Zewgen bittens umb ewr gnaden insigel und umb das petschadt sind Jorg Vaschanng zu Gaspoltzhoven, Hanns zu Haslach, Jorg Weber zu Niderentaren und meniger genueg. Geschehen an freitag nach sannd Blasentag nach Kristi gepurde viertzehenhunndert und im drewundnewnntzigisten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 369f, Nr. 3303