Dem erwirdigen in Gott und geistlichen herrn herr Johannsen, abbte zu Lambach, meine gnadign lieben herrn, empewtt ich Margreth, Hannsen Newpawr zu Niderentarn saligen gelassne witibe mein gehorsam willig dinst bevor. Ich fueg ewren gnaden zu wissen, das ich all mein geleiche erbschaft und gerechtikait, so ich gehabt hab an und auff der hueb zu Haslach mit aller rechtlichen zugehorung in Gebaltzkircher pharr gelegen in Starhemberger lanndtgericht und ist ewrer gnaden gotshawss Lambach urbar und dinstpar, zu statem ewigen kauff verkawft meinem lieben vettern Hannsen zu Haslach, der yetzund hewslich darauff sitzt, Elspechten, seiner eelichen hawsfraw und irer baider erbm, und Thaman und Wolfgang des obgenanten Hannsen geprueder und iren erbm, darauf bitt ich ewr gnad mit sunderm allem vleis, welle denselben meinen vetern und muemen und iren erbm ain genuegsamen landtlewffigen kawfbrieff daruber verfertigen. Und wan ewr gnad das also gethan hat, so gelob ich ewren gnaden fur mich und all mein erbm in ewr genaden verfertigung und in sigll nicht zu reden, wenig noch vill, sunder mit meinen willigen dinsten umb euch verdienen. Und des zu warm urkundt schickh ich ewren gnaden den offen bettbrieff verfertigt durch meiner vleissigen gepett willen mit des erbern weisen Wolfganng Hainpuecher, an der zeit ewrer gnaden ambtmann aufgedrukten petschadt, doch im, sein erbm unnd petschadt an schadn und unengollten ewrer gnaden gotshaus vordrung und rechten in allen sachen, under das petschadt ich mich obgemelte Margreth fur mich und all mein erbm verpintt bei meinen trewen an aidesweis alles das war und stet zu hallten inhallt des vertzeichbriefs, zewgen bittens umb das petschadt und umb ewr gnaden insigll an den kawfbrief sind dy erbern Mertan Wolmuet zu Oberfurt, Wolfgang amb Egkh, Jorg Vaschang zu Gaspoltshofen und meniger genueg. Geschehen an pfintztag nach den osterfeirtagen nach Christi gepurde viertzehenhundert und darnach in dem drewundnewntzigisten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 380f, Nr. 3313