Dem erwierding in Got herrn abbtt Johanns zu Lambach unserm gnadigen herrn empiet wier ich Michel Welser, staynmecz, ich Jorig Obermayr zu Nehaim, ich Hannss Myttermayr zu obern Labb geprueder und nemen unns auch an fuer unser prueder Sigmundn und Thoman, die dan nicht bey lande sein, unser willig gehorsam dienst und fuegen euren gnaden zu wissen, als wier uns umb unsers brueder kynnd Joring angenomen habm von wegn ainss gelts, so Wolfgang Resch zu Pawngarting und Warbara, seiner hausfrawn, sein gesprochen wordn von seines vater Jacob Marhell saling glassn guett unssers brueder, dar umb dan von unss obenannten ain verczicht von uns anstat des kinds zu gebm gerecht ist, also pit wier ewr gnad mit aller diemuetykait, eur gnad welle ain gwonndliche verczicht mit euren gnaden verfertigung von unns ausgeund und an dye benanntn khonnlewt in eribm lauttund vertigen. Und so eur gnad das also gethan als dan, so globm wier eurn gnadn fuer uns und an stat des kynnds und fuer unser brueder brueder, dy nicht pey lande sein und fuer all unser eribm in euren gnadn verfertigung und bestatt nichts zu redn, sunder mit aller diemuetigkait gehorsamlich verdien, und senndn des euren gnadn dy offn petczetl verfertigt und bestat mit der ersamen weisn Thaman Hoffer und Thaman Puntschuech Schmidt, bayd burger zw Wells, aufgedrugktn petschad, dy wier dan ir bayder weisheit mit vleiss dar umben gepettn habm, doch ien baydn, iern eribm an schadn, under die petschad wier unss obgenannt Michel Wellser, stainmecz, Jorig Obermayr, Hanns Mittermayr geprueder und fuer unser prueder Sigmundn und Thaman, dy nicht bey lande sein, und anstatt unsers brueder saling kinnd und fuer all unser eribem verpittn aydes weis alles das war stat zu haltn inhalt der petzetl, die gebm ist an sambstag sannd Genesy des martrar im drewundneunczigistn jar etc.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 381f, Nr. 3314