Dem erwirdigen in Got und geistlichen herrn herrn Johannsn, abbte zu Lambach, unnserm genedigen herrn, embieten wir ich Thaman Obslar, burger zu Wienn, ich Jorig Kramer, inwoner zu Wells, und ich Dorothea sein hausfraw, unnser willig dienst bevor, und fuegn eurn genadn zu wissen, das wir recht und redlich verkauft und zu kauffn gebm habem Matheusen dem Slechmair, seiner hausfrawn und irn baidn eribem all unnser eribschaft und gerechtigkait, so wir gehabt habem an und auf dem Slechhof seiner zuegehorung in Welser pharr gelegn, der eurn genadn und eurn genadn gozhaus Lambach dienstparig und urbar gutt ist, hier auf bittn wir euren genad mit sonderm vlews, ir wellet dem obenantn Slechmair, seiner benanten hausfrawn und irn baidn eribm darumben nach gewonhait euren genadn goczhaus ain genuegsamen kauf brief mit eurn genadn insigil vertigen und bestattn, welln wir willig gern umb eur genad verdien. Und wann ir das also gethann, als dann gelobem und versprechen wir und fur all unnser eribem wissenlich und in kraft des brief furann in euren insigil vertigung und bestat mit nichte zu reden, sunder alles war und stat zu halten inhalt des briefs, den wir eurm genadn ze urkundt senden, bewart mit der erbern Hannsn Stainhuber, burger zu Wells und maister Thaman des Puntschuech smid, inwoner daselbs, baider aufgedrukhten petschadtn, die wir mit sonderm slews dar umb gepettn habenn, doch in und irn baidn eribem an schaden. Geben nach der gepurde Kristi im vierzehennhundert und drew und newnzigistn jaren an eritag vor sand Jacobs tag im schnit des heiligen zwelifpotten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 391f, Nr. 3324