Erwirdiger in Gott genediger herr, mein willig dinst sein euch alzeit bevor. Als ich vor ewrn gnaden menigermalln geschribn und verpotschaft hab von wegn des Lerochs am Stadl, das der mit dem wartzaichn handlt wider alts herkomen, daraus der kayserlichen mayestat, seiner gnaden kamerguet und seiner gnaden ambtlewtten grosser schade erstett ursach, der ambtmann vermaint das salcz lig am Stadl still zw bezallung der kayserlichen mayestat, so der ambtman darauf zaigt, so ist das salcz an seinen willen, wissen und warzaichn langst verkauft, und da ettlich fertiger werdn mit solher handlung sovill schuldig, das sie nicht halbs zw bezalln habn, wes des die kayserlich mayestat herren Cristog Gorigen und ich als ambtlewt und nun mein gnaden herren ain zeit her ob v^c guldn schadn genomen habn, do dy fertiger mit weg und den ambtman mit solher handlung betrogn habn. Ich hab auch ewren gnaden von des jungstn salts wegn geschribn, das ich der kayserlichen mayestat zw paw seiner gnaden weingertn habn hab solln, das Leroch an warzaichn aus lassn hat wider sein aid und glubs, so er mir am jungisten deshalben getan hat. Das ewr gnaden weg gedenkh euch selbs und mich vor schadn zu verhuettn. Darauf mir noch bisher kain antburt worden, und der kellermaister verdenkht mich deshalbm mit un vleis, und vermaint mich gegn der kayserlichen und koniglichen mayestat zu verklagen. Nwn hat ewr gnad ain guete zeit her sich an mein klag und mangl nicht kertt, so deshalbn dy kayserlich mayestat an seiner gnaden kainer guet genomen hat und hat vermaint, Leroch wiss sein ambt wel zw warttn und handl nichts gefarigs das der kayserlichen mayestat kamerguet zw schadn komb, secz ich ewrn gnaden haim und ob nwn weiter mein gnedig herren der verbeser ich iczo des ambts halbn pin und ich gegn irn gnaden der hanndlung halbn des Leroch mit dem warzaichn schadn nemen werdn, werdn wir uns versehn pey ewrn gnaden zu halttnn und pitt darauf ewr gnad umb verschribn antburt pey dem gegnburtign petn das ich mich wiss gegn meinen gnaden hinder mit dem ambt weiter zw haltn. Gebn zw Gmundn eritags nach sand Erasm tag anno etc. lxxxxiii^o.

Wolfgang Oder||
Ambtmann zw Gmunden